Сыйлық тарийхый илимий нәтийже алған Double Asteroid Redirection Test (DART) халықаралық космослық миссиясын әмелге асырыўға қосқан үлкен үлеси ушын берилген.
DART миссиясы инсаният тарийхында астероид орбитасын мақсетли өзгертиўге қаратылған планеталық қорғаў бойынша биринши тәжирийбе болды. 2022-жыл 26-сентябрь күни космослық аппарат Дидимос қос астероид системасының жолдасы - Диморфос астероиды менен кинетикалық соқлығысыўды әмелге асырды. Соққы нәтийжесинде Диморфоздың Дидимос әтирапындағы орбиталық дәўири өзгерди.
Бул өзгеристи жер ҳәм космос телескоплары жәрдеминде анық белгилеўге ерискени принципиаллық әҳмийетке ийе болды. Солай етип тарийхта биринши мәрте астероид орбитасы жасалма түрде өзгертилди ҳәм тәжирийбеде илимий жақтан тастыйықланды.
Институт илимпазлары жер үсти бақлаўларының халықаралық топарында белсене қатнасып, Майданак обсерваториясының телескоплары жәрдеминде фотометрлик изертлеўлер алып барды. Олардың есаплаўлары орбиталық дәўирдиң өзгериў дәрежесин анықлаў ҳәм тәжирийбениң табыслы өткенин тастыйықлаў имканиятын берди.
«Group Achievement Award» сыйлығы NASA тәрепинен илимий жәмәәттиң хызметин тән алыўдың жоқары көриниси болып есапланады.
Бул жетискенлик тек ғана илимпазлар ушын емес, ал пүткил Өзбекстан илими ушын әҳмийетли дәўир болды. Илимлер академиясы Атабек Бурханов ҳәм Камолиддин Эргашевти абырайлы сыйлық пенен қызғын қутлықлайды ҳәм оларға жаңа илимий жетискенликлер тилейди.
