Илажда 300 ден аслам қатнасыўшы - халықаралық шөлкемлер, дипломатиялық миссиялар ҳәм тәбиятты қорғаў структураларының ўәкиллери қатнасты. Өзбекстаннан БМШ жанындағы турақлы ўәкил Элдиёр Тошматов қатнасты.
CITES Бас хаткери Ивонн Игуэро Самарқандқа 185 мәмлекеттен 3 мыңға шамалас делегат келетуғынын атап өтип, конференция Конвенция тарийхындағы ең ири конференциялардан бири болатуғынын атап өтти.
"Самарқанд жабайы тәбиятты сақлаў менен шуғылланыўшылар ушын тартымлы орынға айланады. Өзбекстан "жасыл раўажланыў" жолын таңлап, экологиялық сиясат мәмлекеттиң стратегиялық раўажланыўының бир бөлеги бола алатуғынына үлги болмақта", - деп атап өтти ол.
Өзбекстан тәрепи кең көлемли таярлық ҳаққында айтып өтти: көргизбе ҳәм сессиялардан тартып экспертлик форумларға шекемги болған 110 нан аслам параллель илажлар режелестирилген. Күн тәртибине Конвенция қосымшаларын жаңалаў бойынша 114 мәселе, 149 жумысшы ҳүжжет ҳәм 51 усыныс киргизилген.
Атап өтилгениндей, Президент Шавкат Мирзиёевтиң басшылығында елимизде экологиялық реформалар жедел әмелге асырылмақта - климат өзгериўине қарсы гүресиў, экосистемаларды тиклеў ҳәм тәбийғый ресурслардан ақылға уғрас пайдаланыўда инновациялық көзқараслар енгизилмекте.
Самарқандта болып өтетуғын CITES COP20 Өзбекстанның тәбиятты қорғаў тараўындағы жетискенликлерин дүньяға көрсетиў ҳәм оның глобал тәбиятты қорғаў басламаларында исенимли шерик сыпатындағы орнын беккемлеў имканияты болады.
