Илажда Өзбекстан Саўда-санаат палатасының баслығы Даврон Ваҳобов, Беларусь саўда-санаат палатасының баслығы Михаил Мятликов, тийисли министрликлер ҳәм уйымлар, тармақ бирлеспелериниң басшылары, сондай-ақ, еки елдиң исбилермен топарларының ўәкиллери қатнасты.
Атап өтилгениндей, Исбилерменлер кеңеси еки мәмлекет исбилерменлери арасындағы шериклик байланысларын беккемлеў, қоспа инвестициялық жойбарларды алға қойыў ҳәм әмелий мәселелерди жедел шешиў ушын нәтийжели майданға айланды.
Бүгинги күнде Өзбекстанда Беларусь капиталының қатнасыўында 242 кәрхана жумыс алып бармақта, соннан 57 и қоспа, 185 и сырт ел кәрханалары болып есапланады. Бул көрсеткишлер бирге ислесиўдиң әмелий нәтийжелеринен айқын дәрек береди.
Мәжилис даўамында аўыл хожалығы ҳәм азық-аўқат санааты, машина қурылысы, тоқымашылық ҳәм былғары аяқ кийим, мебель қурылысы ҳәм ағашты қайта ислеў тараўлары тийкарғы бағдарлар сыпатында белгиленди. Тармақ комиссиялары шеңберинде жаңа биргеликтеги инвестициялық жойбарларды әмелге асырыў мәселелери де додаланды.
Ушырасыў жуўмағында машина қурылысы ҳәм агротехника, тоқымашылық ҳәм жеңил санаат, фармацевтика, қурылыс, азық-аўқат санааты, биржа саўдасы ҳәм логистика тараўларын қамтып алған 12 ҳүжжетке қол қойылды.
