«Өзбекстан – 2030» стратегиясында елді аймақтық IT-хабқа айналдыру мақсаты белгіленген. Осы мақсатта цифрлық технологияларды кезең-кезеңімен дамыту жалғасуда. Барлық өңірлерде IT-парктер құрылып, бұл салада білім алу мен жұмыс істеу мүмкіндіктері кеңейтілді. Интернеттің жылдамдығы мен қамту деңгейі артты, нәтижесінде 190 мыңнан астам адам жұмыспен қамтылды.
Кейінгі жылдары бұл салаға 3 миллиард доллар инвестиция тартылды. Шетелдік капитал қатысуындағы кәсіпорындар саны 2017 жылмен салыстырғанда 8,5 есе өсіп, 1 мыңнан асты. Бүгінде салалық қызметкерлердің әрбір оныншысы осындай халықаралық компанияларда жұмыс істейді. Сондай-ақ, жеті жыл бұрын экспортқа жұмыс істейтін бар болғаны 12 компания ғана болса, биыл олардың саны 650-ге жетті. Жыл соңында ақпараттық технологиялар мен байланыс қызметтерінің экспорты 900 миллион доллардан асады.
Жасанды интеллектті қолдану ауқымы кеңеюде. Мұндай технологияларға негізделген 20-дан астам жоба іске қосылды. Салалар мен ірі кәсіпорындарға арналған тағы 70 жоба әзірленді. Жасанды интеллектке дайындықтың халықаралық индексінде Өзбекстан 17 сатыға көтерілді.
Бұл бағыттағы жұмыстар жалғасы ретінде, биыл 14 қазанда Президенттің жарлығымен 2030 жылға дейінгі жасанды интеллект технологияларын дамыту стратегиясы қабылданды. Онда жасанды интеллектке негізделген бағдарламалық өнімдер мен қызметтердің үлесін арттыру, техникалық инфрақұрылымды кеңейту және кадрлардың біліктілігін арттыру сынды шаралар белгіленген.
Таныстырылымда цифрлық технологиялар министрі келесі жылға арналған жоспарлар туралы ақпарат берді.
Атап айтқанда, Бұхара, Ферғана және Ташкент облыстарында «бұлтты» мәліметтер орталықтары іске қосылады. Стартаптарға жағдай жасау үшін Ташкент ақпараттық технологиялар университеті мен Инха университетінде жасанды интеллект бойынша зертханалар ашылады. Мемлекеттік органдардың 3 мың қызметкері, әкімдер мен олардың орынбасарларының біліктілігі арттырылады.
Жауапты тұлғаларға жасанды интеллект негізінде жұмыс істейтін жобалар санын 100-ге дейін жеткізу, бағдарламалық өнімдер мен қызметтер көлемін 50 миллион долларға дейін арттыру міндеті қойылды.
Салалық кәсіпорындарда басталған трансформация оң нәтиже беруде. Биыл телекоммуникация қызметтерінің көлемі 16 пайызға өсіп, 21 триллион сумды құрады. «Узбектелеком» компаниясының кірісі 9 триллион сумнан асты.
Енді келесі жылы басқаруды толық цифрландыру, шығындарды оңтайландыру, экологиялық, әлеуметтік және корпоративтік басқару қағидаттарын енгізу арқылы халықаралық рейтинг алудың маңыздылығы атап өтілді.
«Өзбекстан поштасы» жүйесінде де өзгерістер бар. Биыл пошта кірісі 1,4 есе, экспорт 20 пайызға өсті. Жаңа қызмет түрлерінің енгізілуі нәтижесінде жөнелтілімдер саны 50 пайызға артты.
Жоспар бойынша, келесі жылы 1600 пошта бөлімшесінде электрондық сауда өнімдерін қабылдау жолға қойылады. Цифрлық сұрыптау орталығы ашылып, осындай тауарлар мен пошта жөнелтілімдерін өңдеу сапасы жақсарады. Бұл мақсаттар үшін Еуропа қайта құру және даму банкінен қаражат тартылады.
Сала үшін маңызды негіз – телекоммуникациялар туралы заң жаңа редакцияда қабылданды. Енді осы заңға сүйене отырып, барлық салалар мен өңірлерде цифрландыру бойынша екі жылдық бағдарлама әзірленетін болады.
Атап айтқанда, келесі жылы 6 мың жаңа базалық станция салынады. 30 мың шақырым талшықты-оптикалық кабель тартылып, қамту деңгейі 98 пайызға жетеді. Сала экспорты 1,2 миллиард долларға жеткізіледі.
Президенттің бастамасымен құрылып жатқан Цифрлық технологиялардың халықаралық орталығы туралы заң саланың дамуы үшін үлкен жаңалық болмақ. «Enterprise Uzbekistan» деп аталатын бұл орталықта «ағылшын құқығы» қағидаттары, капиталдың еркін қозғалысы, халықаралық стандарттардағы еңбек қатынастары және шетелдік банктер филиалдары енгізіледі.
Тұсаукесерде жасанды интеллектке қатысты заңнамалық негіздерді әзірлеу, цифрлық технологиялар саласындағы білім беруді дамыту бойынша нақты тапсырмалар берілді.
