Бугун ўрта вазн тоифасида кечадиган баҳсларда 4 нафар ҳамюртимиз медаллар учун кураш олиб боради.
Хусусан, - 73 килограмм вазн тоифасида спортчимиз Обидхон Нўмонов польшалик рақиби Адам Стодолски, -81 килограммда Ҳикматуллоҳ Тўраев грузиялик Леван Гугава ва грециялик Атанасиос Милонелис ўртасида кечадиган баҳс ғолиби билан куч синашади. Худди шу вазндаги яна бир спортчимиз Мусо Собиров эса Иброҳим Кейта (Франция)га, - 70 килограммдаги спортчимиз Шоҳиста Назарова эса польшалик Урсула Хофманга қарши гиламга чиқади.
Эслатиб ўтамиз, кечаги кун баҳсларида -52 килограмм вазн тоифасида барча рақибларини мағлубиятга учратган ҳамюртимиз Диёра Келдиёрова мусобақа ғолибига айланди.
Барча беллашувларни муддатидан аввал якунлаб келаётган самарқандлик дзюдочимиз финалда ҳам чемпионлик учун кўп вақт сарфламади. Токио-2020 Олимпиадаси чемпиони косоволик Дистрия Красничи атиги 40 сония ичида таслим этилди.
Бу Келдиёрова учун "Катта дубулға" турнирларидаги тўртинчи олтин медаль ҳисобланади. Ушбу ғалаба орқали у жаҳон рейтинги учун 1000, Париж-2024 йўлида 500 очкони ўз ҳисобига қўшиб қўймоқда.