Ин рӯйдод дар рушди ҳамкориҳои байналмилалӣ дар соҳаи омӯзиш, ҳифз ва тарғиби мероси бойи фарҳангии Ӯзбекистон қадами муҳим гардид.
Дар ҷараёни маросим таъкид шуд, ки таҳияи ин силсилаи нодир сиёсати давлатии Ӯзбекистонро инъикос менамояд, ки ба ҳифзи мероси таърихӣ ва фарҳангии миллӣ ва тарғиби фаъолонаи он дар сатҳи байналмилалӣ равона шудааст.
Силсилаи китоб-албомҳо маҷмӯаи бузурги маълумот дар бораи асарҳои санъатро, ки ба Ӯзбекистон марбутанд ва дар осорхонаҳо ва маҷмӯаҳои хусусии кишварҳои гуногуни ҷаҳон маҳфузанд, дар бар мегирад. Ин нашрияҳо дар омӯзиш ва ҳифзи мероси фарҳангӣ ва барои наслҳои оянда расондани онҳо нақши муҳим доранд.
Роҳбари шӯъбаи Ховари Миёнаи Китобхонаи Конгресси ИМА хонум Ҷоан Уикс саҳми арзишманди мероси фарҳангии Ӯзбекистонро дар тамаддуни ҷаҳонӣ қайд намуда, изҳор дошт, ки супоридани ин маҷмӯа дар таҳкими ҳамкориҳои илмӣ ва фарҳангии байналмилалӣ қадами муҳиме хоҳад шуд. Вай инчунин итминон изҳор намуд, ки ин китобҳо барои муҳаққиқон ва олимони тамоми ҷаҳон манбаи гаронбаҳо хоҳанд буд.
Супурдани ин маҷмӯа ба ҷомеаи васеъ ва доираҳои академии ИМА имконияти нодир фароҳам меорад, ки мероси ғании фарҳангии Ӯзбекистонро амиқтар омӯзанд. Ин рӯйдод робитаҳои фарҳангӣ ва илмиро байни Ӯзбекистон ва Иёлоти Муттаҳида мустаҳкам намуда, ба рушди муколамаи илмӣ ва ҳамдигарфаҳмии байни халқҳо мусоидат мекунад.
Китобхонаи Конгресси ИМА, ки соли 1800 таъсис ёфтааст, бузургтарин бойгони китоб дар ҷаҳон буда, зиёда аз 170 миллион нашрия, аз ҷумла китобҳо, дастнависҳо, харитаҳо, аксҳо ва сабтҳои аудиоро дар бар мегирад. Он нақши китобхонаи миллии ИМА ва маркази илмӣ-тадқиқотии назди Конгресси ИМА-ро мебозад.
