O'zbekiston Respublikasi fuqarolari sog'liqni saqlash borasida daxlsiz bo'lib, davlat yoshi, jinsi, irqi, millati, tili, dinga munosabati, ijtimoiy kelib chiqishi, e'tiqodi, shaxsiy va ijtimoiy mavqeidan qat'iy nazar sog'lig'i saqlanishini ta'minlaydi.
Umumxalq muhokamasiga qo'yilgan “O'zbekiston Respublikasining Konstitutsiyasiga o'zgartish va qo'shimchalar kiritish to'g'risida”gi O'zbekiston Respublikasining Konstitutsiyaviy qonuni loyihasining 40-moddasiga kiritilayotgan qo'shimchalarga ko'ra, O'zbekiston Respublikasi fuqarolari tibbiy yordamning qonunda belgilangan hamda tez va shoshilinch tibbiy yordamni ham o'z ichiga oladigan kafolatlangan hajmini bepul olishga haqli ekanligi, davlat tomonidan sog'liqni saqlashning davlat, xususiy va boshqa tizimlarini rivojlantirish, sanitariya-epidemiologik osoyishtalikni ta'minlash, tibbiy sug'urtaning turli shakllarini rivojlantirish uchun shart-sharoitlar yaratish bo'yicha zarur choralar ko'rilishi belgilab qo'yilgan.
Shuningdek, davlat barqaror rivojlanish printsipiga muvofiq atrof-muhitni yaxshilash, tiklash va himoya qilish, ekologik muvozanatni saqlash bo'yicha chora-tadbirlarni amalga oshiradi.
Davlat Orolbo'yi mintaqasining ekologik tizimini himoya qilish va tiklash, uni ijtimoiy, iqtisodiy jihatdan barqaror rivojlantirish bo'yicha zarur choralar ko'radi. Bu esa, o'z navbatida, ekologik jihatdan og'ir bo'lgan hududlarga davlat tomonidan alohida e'tibor qaratilishini, Konstitutsiya darajasida belgilanishi esa mas'uliyatni yanada oshirishni anglatadi.
Shuni ham alohida ta'kidlash lozimki, Konstitutsiyaga kiritish taklif qilinayotgan 401-moddaga ko'ra har kim sog'lom va qulay atrof muhitga, uning holati haqida haqqoniy axborotga ega bo'lish hamda o'z sog'lig'iga yoki mol-mulkiga ekologik huquqbuzarlik tufayli etkazilgan zararning o'rni qoplanishi huquqiga egaligi belgilab qo'yilmoqda.
Mamlakatimizda o'tgan davr mobaynida sog'liqni saqlash sohasida keng qamrovli isloholotlarni amalga oshirish jarayonida ko'pgina qaror va farmonlar qabul qilinib, sog'liqni saqlash sohasining normativ-huquqiy bazasi yaratildi. Konstitutsiyaga kiritish taklif qilinayotgan qo'shimcha normalar esa sog'liqni saqlash sohasini huquqiy tartibga solishga hamda aholining sog'lig'ini saqlash borasidagi huquqini ta'minlashga xizmat qiladi.
Ilhomjon Abdusattorov,
Toshkent viloyati adliya boshqarmasi
boshlig'i o'rinbosari
