Mamlakatimizdagi izchil islohotlar, yoshlar siyosati borasidagi yangicha yondashuvlar bugun oʻz mevasini bermoqda. Davlatimiz rahbarining yoshlarga mehrini, ularga koʻrsatayotgan ragʻbatini yurtdoshlarimiz har kuni koʻrib, bilib turibdi.
Shu yil 14-fevral kuni navqiron yoshlar bilan boʻlgan uchrashuvda bu mehr, bu ragʻbat yana bir bor koʻrindi. Prezidentimiz muloqotni “Buyuk shoirimiz Erkin Vohidov aytganidek, yoshlik — bu qalbning oltin sozi. Bunga qoʻshimcha qilib, yoshlar — xalqimizning, Vatani-mizning oltin fondi, desak toʻgʻri boʻladi”, deya boshlagani qalbimizni toʻlqinlantirib yubordi, dilimizni faxr-iftixorga toʻldirdi.
Davlatimiz yetakchisi yoshlar bilan muloqotida kechiktirib boʻlmaydigan bir qancha dolzarb masalalarga batafsil toʻxtalib, yechimlarini koʻrsatib berdi. Jumladan, yoshlar maʼnaviyatini yuksaltirishda badiiy adabiyotning oʻrni juda katta ekanini aytib oʻtdi. Oʻzbekiston Qahramoni, xalq shoiri, ustozimiz Erkin Vohidov birinchi muharriri boʻlgan “Yoshlik” jurnali faoliyatini kuchaytirib, uni yana yoshlarimiz sevib oʻqiydigan nashrga aylantirish muhimligini taʼkidladi.
“Yoshlik” jurnali xodimlari bu tabarruk dargohda xizmat qilayotganidan doim faxrlanib yuradi. Oʻzbek xalqining soʻnggi qirq yillik tarixiga eʼtibor qaratsak, jurnal millatning adabiy tafakkuriga, intellektiga, madaniyati va sanʼatiga sezilarli taʼsir koʻrsatganiga shohid boʻlamiz.
Jurnal oʻz davrida ijtimoiy-adabiy zarurat tufayli maydonga kelgan. Mana shu zarurat tahririyat xodimlariga yillar davomida gʻayrat bagʻishlab keladi. Nashrga xalqimizning ardoqli farzandi, davlat va jamoat arbobi Sharof Rashidov “Yoshlik” jurnali adabiyotimiz gulshanida oʻziga xos nurafshon bir bogʻ boʻlib qolsin. Bu boqqa qadam qoʻyganlar undan hamisha xushnud, koʻngli munavvar boʻlib chiqsin. Unda amal olguchi nihollar chinor misol gurkirab oʻssin va chinordek umri boqiy boʻlsin”, deb oq yoʻl tilagan.
Bu tilaklar adabiy hayotimizda oʻzining isbotini topdi. Bugungacha jurnal oʻzbek va jahon adabiyotining eng sara asarlarini targʻib qilish, adabiy va ijtimoiy hayotdagi dolzarb masalalarga jamoatchilik eʼtiborini qaratish, yosh isteʼdodlarni kashf etishni oʻzining asosiy vazifasi deb bildi.
Jurnal tashkil etilgan yillarda adabiyotimizga kirib kelayotgan yosh isteʼdodlarning badiiy yetuk asarlari ayni shu nashrda bosilib chiqdi. Jumladan, oʻzbek adabiyotida alohida hodisa boʻlgan “Saodat sohili”, “Javob”, “Asqartogʻ tomonlarda”, “Dunyoning ishlari”, “Yolgʻonchi farishtalar”, “Temir xotin”, “Otamdan qolgan dalalar” kabi asarlar, ozodlik va hurriyat mavzularidagi sheʼriy turkumlar, jahon adabiyotidan oʻzbek tiliga mahorat bilan oʻgirilgan “Abadiyat qonuni”, “Osh kora qotillik”, “Asrga tatigulik kun”, “Ityurak” singari durdona asarlar ayni shu jurnalda nashr etildi.
“Yoshlik”ni elga manzur etish yoʻlida yuzlab isteʼdodli adiblar mehnat qildi. Ayniqsa, xalqimizning istiqlol orzusi, oʻzbek tilining mavqei, qatagʻon yillarida qurbon boʻlgan ziyolilarimiz boshiga tushgan ogʻir kunlar, xorijda yashayotgan vatandoshlarimiz haqidagi ijtimoiy-publitsistik maqolalar yosh ijodkorlar tomonidan yozilganida yanada ravshan koʻrindi.
Keyingi yillarda Anvar Obidjonning “Moʻttivoymisan, Mittivoy” qissasi, Isajon Sultonning “Genetik” romani, Iqbol Mirzoning “Zarb” qissasi, Luqmon Boʻrixonning “Imom Moturidiy” romani, Shodiqul Hamroning “Qaqnus qanotidagi umr”, Murtazo Qarshiboyevning “Qrim qissasi”, Orziqul Ergashevning “Tursunboyning bolaligi”, Shuhrat Matkarimning “Maqar”, Erpoʻlat Baxtning “Suronlarda oʻtgan bolalik”, Rustam Jabborovning “Shahzodaning iqrori” kabi ajoyib asarlari chop etildi.
Ijodkorning obroʻsini oshiradigan, nashrning nomini koʻtaradigan yagona omil bu, albatta, yuksak saviyadagi asardir. U oʻquvchilar qalbiga yoʻl topsa, katta taassurot qoldirsa, shubhasiz, muallif ham, asarni chop etgan nashr ham tilga tushadi.
Biroq yoshlar uchun eng zarur boʻlgan jurnal keyingi yillarda juda kam adadda chiqdi. Bu tahririyat xodimlarini chuqur oʻyga toldirar, shunday ajoyib asarlar yoshlarimizga yetib bormayotgani qalbni oʻrtar edi.
Muloqotda Prezidentimizning yoshlar hayoti bilan bogʻliq dolzarb masalalar qatorida “Yoshlik” jurnali faoliyatini kuchaytirish borasidagi fikrlari nainki ijodkor yoshlarni, balki barcha ziyolilarning qalbini toʻlqinlantirdi. Zotan, davlatimiz rahbari azmu shijoatga toʻla, navqiron yoshlar timsolida yangi Oʻzbekistonning bugungi va ertangi bunyodkorlarini koʻrayotganini “Kelgusida Uchinchi Renessans poydevorini yaratadigan yangi Xorazmiylar, Beruniylar, Ibn Sinolar, Mirzo Ulugʻbek va Alisher Navoiylar qayerdan paydo boʻladi? Bu ulkan vazifalarni kim bajaradi?
Men qayta-qayta takrorlashdan charchamayman. Albatta, bu ezgu gʻoyalarni sizlar — bugungi Yangi Oʻzbekiston yoshlari amalga oshirasizlar”, deya taʼkidlagani ham bejiz emas. Biz “Yoshlik” jurnalini xalqimizning, ayniqsa, yosh avlodning sevimli zamonaviy nashriga aylantirish yoʻlida isteʼdodli yoshlar bilan birga bor kuch-gʻayratimizni safarbar etishga
tayyormiz.
Nurilla CHORIYEV,
“Yoshlik” jurnali bosh muharriri
