Форумда Туризм комитети баслығының орынбасары Санжар Тажиев, Грузия
туризм ассоциациясының баслығы Натали Квачантирадзе, сондай-ақ, еки мәмлекеттиң
80 нен аслам туризм тараўының ўәкиллери қатнасты.
Илаж Өзбекстан Республикасы Президенти Шавкат Мирзиёевтиң усы жылы
2-3-июль күнлери Грузияға мәмлекетлик сапары даўамында ерисилген келисимлердиң
әмелий даўамы болып, еки мәмлекет туризм компаниялары арасындағы тиккелей бирге
ислесиўди раўажландырыўға қаратылды.
Форумда тәреплер
бирге ислесиўди буннан былай да раўажландырыўдың тийкарғы бағдарларын белгилеп
алды. Атап айтқанда, қоспа туристлик пакетлер ҳәм жаңа жөнелислерди жаратыў,
тиккелей авиақатнаўларды кеңейтиў, мәдений-тарийхый, wellness,
емлеў-саламатландырыў, зыярат, гастрономиялық, экологиялық, саргузашт ҳәм MICE туризмди
раўажландырыў мәселелери додаланды.
Өз-ара танысыў
ҳәм медиатурларды шөлкемлестириў, санлы платформалар арқалы еки мәмлекеттиң
туристлик имканиятларын биргеликте үгит-нәсиятлаў, халықаралық туризм көргизбелеринде
биргеликте қатнасыўға айрықша итибар қаратылды.
Форумның әҳмийетли
бөлеги еки мәмлекет туризм бизнеси ўәкиллериниң тиккелей исбилерменлик
байланысларына бағышланды. Атап айтқанда, презентациялардан соң Өзбекстан ҳәм
Грузия туроператорлары арасында B2B ушырасыўлары өткерилип, олар шеңберинде
компаниялар арасында бирге ислесиўди кеңейтиў, биргеликтеги туризм өнимлерин
қәлиплестириў ҳәм жаңа исбилерменлик байланысларын орнатыў имканиятлары
тиккелей додаланды.
Грузия туризм
тараўы ўәкиллери де Өзбекстанға танысыў сапары шеңберинде мәмлекетимиздиң
туризм өнимлери, мәдений мийрас объектлери ҳәм заманагөй инфраструктурасы менен
ҳәр тәреплеме танысты. Бул келешекте анық мәнзиллердиң имканиятларын есапқа
алған ҳалда туристлик жөнелислерди қәлиплестириў имканиятын береди.
2026-жылдың
январь-июль айларында Грузиядан Өзбекстанға туристлер ағымы 25,9 процентке
өскенин атап өтиў керек. Улыўма етип айтқанда, усы жылдың жети айында
Өзбекстанға дерлик 7,75 миллион сырт ел туристи келди, бул өткен жылдың усы
дәўирине салыстырғанда 22,6 процентке көп. Туризм хызметлериниң экспорты дерлик
3,9 миллиард АҚШ долларын қураған.
