Нызам менен Мийнет кодексине "Бирден-бир миллий мийнет системасы" уйымлараралық программалық-аппарат комплексинде электрон түрде мийнет шәртнамасын рәсмийлестириў тәртибин енгизиўди, мийнет ҳақы сақланбайтуғын дем алыс даўамлылығын белгилеў тәртибин ҳәм хызметкердиң орташа мийнет ҳақысын есаплаў тәртибин өзгертиўди нәзерде тутатуғын қосымшалар ҳәм өзгерислер киргизилмекте.
Сондай-ақ, "Билимлендириў ҳаққында"ғы Нызамға муўапық хызметкерлер кешки ямаса сыртқы билимлендириў формасында оқыўы мүмкин болған билимлендириў шөлкемлериниң түрлерин анықластырыўшы өзгерислер киргизилмекте.
Буннан тысқары, ҳәмиледарлығы ямаса перзенти барлығы себепли хызметкерди жумыстан босатыўға шеклеў енгизилмекте.
Киргизилип атырған өзгерислерге бола, мәмлекетлик уйымлар ҳәм шөлкемлер жумысқа қабыл етиў ўақтында жумысқа кирип атырған шахстың паспортына ямаса идентификациялаўшы ID-картасына, мийнет дәптершесине байланыслы мағлыўматларды еркин түрде, соның ишинде, мәлимлеме системаларындағы уйымлараралық интеграцияласыў платформалары арқалы сорап алады.
Мәмлекетлик пуқаралық хызметкерлердиң мийнетке байланыслы қатнасықларына мийнет ҳаққындағы нызамшылықтың әмел етиўи "Мәмлекетлик пуқаралық хызмет ҳаққында"ғы Нызам менен тәртипке салынбаған бөлеги бойынша қолланылатуғыны белгиленди.
Нызам рәсмий жәрияланған күннен баслап күшке киреди.
