Қабыл етилген декларация ҳәм Traffic International менен биргеликте ислеп шығылған ҳәрекетлер режеси Орайлық Азия мәмлекетлериниң жасаў орталығының жоғалыўы, климат өзгериўи, браконьерлик ҳәм жабайы түрлердиң нызамсыз саўдасы менен байланыслы регионның биологиялық көп түрлилигине қәўип-қәтерлердиң күшейиўине қарсы биргеликте гүресиўге умтылысын сәўлелендиреди.
Ҳүжжет миллий тәбиятты қорғаў, бажыхана, ҳуқық қорғаў ҳәм суд уйымлары арасындағы бирге ислесиўди беккемлеў, жабайы тәбиятқа қарсы жынаятларға қарсы гүресиў бойынша миллий оператив топарларды шөлкемлестириў, мәлимлеме алмасыўды жетилистириў ҳәм заманагөй мониторинг технологияларын алға қойыўды нәзерде тутады.
Регионаллық бирге ислесиў оператив мағлыўматларды турақлы алмасыў, биргеликтеги қадағалаў механизмлерин раўажландырыў, нызамсыз саўдаға қарсы гүресиў бойынша регионаллық тармақты жаратыў, шегараалды аймақларда өз-ара келисилген ҳәрекетлерди әмелге асырыў арқалы беккемленеди.
Буннан тысқары, мәмлекетлер жабайы тәбияттың нызамсыз айланысына қарсы гүресиў, экосистемаларды тиклеў, сийрек ушырасатуғын түрлерди қорғаў, қәнигелердиң маманлығын арттырыў ҳәм турақлы экономикалық шешимлерди қоллап-қуўатлаў, соның ишинде, экотуризмди раўажландырыў ҳәм мәҳәллелердиң қоршаған орталықты қорғаў бағдарындағы басламаларда қатнасыўын қамтып алған бирден-бир стратегиялық шеңберди ислеп шығыў ҳәм әмелиятқа енгизиўге келисип алды.
Самарқанд декларациясына қол қойылыўы Орайлық Азия мәмлекетлериниң регионымыздың сийрек ушырасатуғын тәбийғый мийрасын қәстерлеп сақлаў, экологиялық турақлылық, социаллық тартылыў ҳәм экономикалық раўажланыўдың үнлеслигин тәмийинлеў бойынша биргеликте ҳәрекет етиўге умтылысын көрсетеди.
