Форумға екі елдің жетекші компанияларынан 300-ге жуық басшы мен өкіл қатысты. Пәкістан тарапынан «Al-Rafique Enterprises», «Mehran Dates Products», «Brighto Chemicals», «Transfopower Industries», «FWO», «T.M.C», «Pakistan Mobile», «TCS» және басқа да көптеген компаниялар өкілдері қатысты.
Мемлекет басшысы өз сөзінде бүгінгі өткен тиімді келіссөздер барысында көпжақты серіктестікті кеңейту мәселелері жан-жақты талқыланғанын және үлкен жоспарлар мен міндеттер белгіленгенін атап өтті. Сондай-ақ, Жоғары деңгейдегі стратегиялық серіктестік кеңесін құру туралы келісім жасалды.
Сауда-экономикалық ынтымақтастық екіжақты қарым-қатынастың басты қозғаушы күші ретінде айқындалды.
- Үлкен әлеуетке ие экономикаларымыз бір-бірін толықтыруға қабілетті, - деді Президент.
Өткен жылдың қорытындысы бойынша, екі ел арасындағы сауда айналымы 400 миллион доллардан асты, 130 бірлескен кәсіпорын жұмыс істеп жатыр. Осылайша, Өзбекстан Пәкістанның Орталық Азиядағы ең ірі сауда серіктесіне айналды.
Соңғы жылдары бизнес үшін қолайлы жағдай жасау бойынша белсенді шаралар жүзеге асырылуда. Лахормен әуе қатынастары қайта жанданып, рейстер санын арттыру және бағыттарын кеңейту жоспарланған. Бизнес форумдары мен өнеркәсіп көрмелері өткізіліп, Карачи мен Ташкентте сауда үйлері ашылды.
Өзбекстан-Пәкістан ынтымақтастығы жаңа жобалармен толығуда. «Pak Merit», «Diamond Group», «Silk-way», «Getz Pharm», «Gerbion», «NLS» және басқа да компаниялармен бірлескен жобалар жүзеге асырылуда.
Президент екіжақты ынтымақтастықты одан әрі кеңейту бойынша бірқатар ұсыныстарды алға тартты.
Ең алдымен, жылына кемінде екі рет – Өзбекстан мен Пәкістанда бизнес өкілдерінің қатысуымен іскерлік іс-шараларды тұрақты түрде өткізу қажеттігі атап өтілді.
Географиялық жақындықты ескере отырып, сауда айналымын айтарлықтай арттыру, оның ішінде қолданыстағы Преференциялық сауда келісімі аясында тауарлар номенклатурасын кеңейту, фитосанитарлық, карантиндік және кедендік рәсімдерді жеңілдету, банк аралық есеп айырысу механизмдерін жетілдіру қажеттігі айтылды. Электронды сауда платформаларын интеграциялауға ерекше көңіл бөлінетін болады.
Көлік-логистика мүмкіндіктері кеңейіп келеді. Соңғы жылдары екі ел арасындағы жүк тасымалы көлемі 5 есе артты. Осы саладағы ынтымақтастықты кеңейту мақсатында бірлескен көлік-логистикалық компания құру жоспарланған.
Қытайды Орталық Азиямен байланыстыратын теміржол құрылысының басталғаны атап өтілді. Болашақта бұл стратегиялық жол Пәкістан порттарына шығуы мүмкін, бұл өзара сауда мен инвестицияларды айтарлықтай арттыруға мүмкіндік береді.
Өнеркәсіптік кооперацияны қарқынды дамыту – екі елдің де түбегейлі мүддесіне сәйкес келеді.
Фармацевтика, ауыл шаруашылығы, геология, тау-кен, электротехника, тоқыма және былғары өнеркәсібі секілді салаларда бірлескен жобалар жүзеге асыру жоспарлануда.
Өңірлер арасындағы ынтымақтастық әлеуетін тиімді пайдалану қажеттігі атап өтілді. Осыған байланысты аймақ басшыларының өзара сапарларын жандандыру және бұл процеске екі елдің іскер топтарын кеңінен тарту маңызды екені айтылды.
Өз кезегінде Пәкістан Премьер-Министрі Шахбаз Шариф Өзбекстан Республикасының Президенті Шавкат Мирзиёевтің басшылығымен жүзеге асырылып жатқан ауқымды реформалар бағдарламасын, сондай-ақ, бизнес жүргізу үшін жасалған қолайлы жағдайларды жоғары бағалап, екі ел арасындағы серіктестікті кеңейту үшін үлкен мүмкіндіктер бар екенін атап өтті.
