Дар ин чорабинӣ тақрибан 300 роҳбар ва намояндагони ширкатҳои пешсафи ҳар ду кишвар ҳузур доштанд. Бизнеси Покистонро чунин ширкатҳо: Al-Rafique Enterprises, Mehran Dates Products, Brighto Chemicals, Transfopower Industries, FWO, T.M.C, Pakistan Mobile, TCS ва дигарон намояндагӣ карданд.
Президенти Ӯзбекистон дар суханронии худ таъкид кард, ки дар рафти гуфтушунидҳои судманд масоили тавсеаи минбаъдаи ҳамкориҳои гуногунҷанба муҳокима гардида, нақшаҳо ва вазифаҳои бузург муайян шуданд. Ба мувофиқа расиданд, ки Шӯрои олии шарикии стратегӣ таъсис дода шавад.
Ҳамкории иқтисодию тиҷоратӣ ҳамчун омили асосии равобити дуҷониба муайян гардид.
– Иқтисодиёти мо, ки дорои иқтидори бузург мебошанд, метавонанд ҳамдигарро самаранок пурра кунанд, – гуфт Президент.
Бинобар ҷамъбасти соли гузашта ҳаҷми мубодилаи тиҷоратӣ аз 400 миллион доллар гузашт ва 130 корхона фаъолият мекунад. Дар ин замина, Ӯзбекистон ба бузургтарин шарики тиҷоратии Покистон дар Осиёи Марказӣ табдил ёфтааст.
Солҳои охир тадбирҳои муштараке барои ташаккул додани шароити мусоид барои бизнес амалӣ шуда истодаанд. Парвозҳои ҳавоӣ бо Лоҳур аз нав барқарор карда шуданд, нақшаҳо барои афзоиши шумораи парвозҳо ва тавсеаи ҷуғрофияи онҳо вуҷуд доранд. Форумҳои тиҷоратӣ ва намоишгоҳҳои саноатӣ баргузор мешаванд. Дар Карачӣ ва Тошканд хонаҳои тиҷоратӣ таъсис дода шудаанд.
Ҳамкории Ӯзбекистону Покистон бо лоиҳаҳои нав ғанӣ мегардад. Лоиҳаҳо бо ширкатҳои Pak Merit, Diamond Group, Silk-way, Getz Pharm, Gerbion, NLS ва дигарон амалӣ шуда истодаанд.
Сарвари давлати мо барои густариши минбаъдаи ҳамкории дуҷониба як қатор пешниҳодҳо ироа намуд.
Пеш аз ҳама, зарурати баргузории мунтазами чорабиниҳои тиҷоратӣ бо иштироки васеи соҳибкорон ҳадди аққал 2 маротиба дар як сол – дар Ӯзбекистон ва Покистон таъкид гардид.
Бо дарназардошти наздикии ҷуғрофӣ, зарурати беш аз пеш афзоиш додани ҳаҷми мубодилаи тиҷоратӣ зикр шуд. Ин афзоиш метавонад тавассути васеъ кардани рӯйхати молҳо дар доираи Созишномаи мавҷудаи тиҷорати имтиёзнок, содда кардани расмиёти фитосанитарӣ, карантинӣ ва гумрукӣ, инчунин такмили механизмҳои ҳисоббаробаркуниҳои байнибонкӣ ба даст оварда шавад. Ба ҳамгироии платформаҳои электронии тиҷоратӣ таваҷҷуҳи махсус дода мешавад.
Дар соҳаи нақлиёт ва логистика имкониятҳо васеъ мешаванд. Дар чанд соли охир ҳаҷми боркашонӣ байни ду кишвар 5 баробар афзоиш ёфтааст. Бо мақсади тавсеаи ҳамкорӣ дар ин самт, таъсиси ширкати нақлиётию логистикии муштарак дар назар аст.
Бо қаноатмандӣ қайд гардид, ки сохтмони роҳи оҳане, ки Чинро бо Осиёи Марказӣ мепайвандад, оғоз шудааст. Дар оянда ин роҳи стратегӣ метавонад то бандарҳои Покистон идома ёфта, ба афзоиши назарраси тиҷорат ва сармоягузории мутақобила мусоидат кунад.
Тавсеаи ҳамкории саноатӣ ба манфиатҳои муҳими кишварҳои мо ҷавобгӯ мебошад.
Сухан дар бораи лоиҳаҳо дар соҳаҳои фармасевтика, кишоварзӣ, геология, саноати истихроҷ, электротехника, нассоҷӣ, чарм ва дигар бахшҳо мераванд.
Зарурати истифодаи самараноки иқтидори ҳамкории байниминтақавӣ таъкид шуд. Дар ин замина, афзоиши сафарҳои мутақобилаи роҳбарони минтақаҳо бо иштироки васеи намояндагони тиҷорати ҳар ду кишвар муҳим арзёбӣ гардид.
Аз тарафи худ, Сарвазири Покистон Шаҳбоз Шариф, бо арҷгузорӣ ба барномаи ислоҳоти васеъмиқёсе, ки таҳти роҳбарии Президенти Ҷумҳурии Ӯзбекистон Шавкат Мирзиёев амалӣ мешавад, инчунин фароҳам оварда шудани шароити мусоид барои пешбурди тиҷорат, имкониятҳои бузурги густариши шарикиро таъкид намуд.
