Вилоят ҳокими Хайрулло Бозоров бошчилигидаги Фарғона вилояти делегация аъзолари Корея пойтахти Сеулдаги «Hanshin Engineering & Construction» компанияси марказий офисида бўлдилар.
Бу ерда компания раҳбарияти билан узоқ давом этган музокаралар натижасида Қўқон шаҳрида «Hanshin Park City» шаҳарчасини барпо этиш бўйича қиймати 250 миллион долларлик инвестицион келишув имзоланди.
Вилоят ҳокими Хайрулло Бозоров ҳамда «Hanshin Engineering & Construction Co Ltd.» раҳбари Чой Мун Кю томонидан имзоланган келишувга кўра, Корея компанияси Қўқон шаҳрида 9, 12 ва 16 қаватли 5122 хонадондан иборат 127 та кўп қаватли турар-жой биноси, таунхауслар, марказий парк, мактаб, болалар боғчаси ва бошқа зарур ижтимоий объектлардан иборат «Hanshin Park City» шаҳарчасини барпо этади. Турар-жойларнинг подвал қисмида 5 000 дан зиёд автомобиллар учун ерости автотураргоҳлари ўрин олади.
3 йиллик режа асосида амалга ошириладиган лойиҳанинг илк пилот босқичида жами 206 та хонадондан иборат 6 та 9 қаватли турар-жой биноси қад ростлайди, деб хабар беради Фарғона вилоят ҳокимлиги матбуот хизмати.
