Бу ҳақда Россия ташқи ишлар вазири Сергей Лавров Давлат думаси ялпи мажлисидаги ҳукумат соатида сўзлаган нутқида маълум қилди.

«Энди биз меҳнат муҳожирларининг асосий қисмини таъминловчи давлатлар билан шундай марказлар очишни талаб қиляпмиз. Булар Қирғизистон, Тожикистон ва Ўзбекистон. Биз меҳнат муҳожирларини тайёрлаш марказлари шу давлатларда ташкил этилиши ҳақида улар билан келишяпмиз», — деди у.

Вазирнинг сўзларига кўра, бундай марказлар мигрантларни рус тилига ва Россия Федерацияси қонунчилигини билишга ўргатиши мумкин, деб ёзади «ТАСС».

С.Лавров муҳожирлар билан боғлиқ юзага келган вазият, хусусан, улар билан боғлиқ ҳодисалар ҳақида гап кетганда, жамиятда эмоционал реакцияга сабаб бўлаётганини таъкидлади. У шунингдек, ҳозирда бу муаммога Ички ишлар вазирлиги томонидан жуда жиддий эътибор қаратилаётганини ҳам таъкидлади.

«Бу жараёнлар бугун жамиятда ноаниқ реакцияга сабаб бўлаётгани аниқ, биз қўшни республикалардан келган меҳнат муҳожирлари билан боғлиқ турли ҳодисалар ҳиссий жиҳатдан қандай қабул қилинаётганини кўриб турибмиз», — дея қўшимча қилди у.

Шу билан бирга, Россия ташқи ишлар вазири таъкидлаганидек, Россия Федерациясидаги меҳнат миграцияси масаласини БАА ёки Қатарда ишлаётган меҳнат муҳожирлари билан таққослаб бўлмайди, чунки МДҲдан келганлар авваллари битта давлат фуқаролари бўлган.

«Бизнинг ҳолатда, бу ҳали ҳам яқинда содир бўлган тарихий, лекин шу билан бирга, албатта, оддий одамларнинг, аммо шу жумладан ўзининг катта ягона ватанида иш қидириб ҳаракат қилишга одатланганлар ҳаётига ҳам салбий таъсир кўрсатди», — деди вазир.