Россия Ички ишлар вазирлиги Россия била Ўзбекистон ўртасидаги келишувни тасдиқланиши ҳақидаги қонун лойиҳасини ишлаб чиқди. Мазкур ҳужжатга мувофиқ икки мамлакат фуқароларининг бошқа мамлакат ҳудудига кириб келгандан бошлаб 15 кун ичида рўйхатдан ўтишдан озод этилиши кўзда тутилган. Бу норматив ҳужжатлар лойиҳаларининг федерал порталида чоп этилган ҳужжатга илова қилинган тушунтириш хатидан олинган, деб хабар беради ТАСС.
Россия фуқароларининг Ўзбекистонга ва Ўзбекистон фуқароларининг Россияга келиш тартиби ҳақидаги битим икки мамлакат Ҳукуматлари томонидан 21 майда Москвада ва 17 июнда Тошкент шаҳрида имзоланган эди.
«Бир давлат фуқароларининг иккинчи давлат ҳудудида бўлишида қулайлик яратиш мақсадида мазкур битимда бир давлат фуқароларининг иккинчи давлат ҳудудида вақтинча бўлиб турган пайтида қабул қилувчи давлатнинг ваколатли органларида кириб келган кундан бошлаб 15 кун ичида рўйхатдан ўтиш (яшаб турган жойида ҳисобга қўйиш) мажбуриятидан озод этилиши кўзда тутилган», — дейилади тушунтириш хатида.
Ҳозирги пайтда мазкур тартиб Беларус, Тожикистон, Арманистон ва Қирғизистон фуқароларига нисбатан қўлланиляпти. Битимнинг амалга оширилиши Россия ва Ўзбекистон ўртасидаги дўстона муносабатларнинг ривожланишига хизмат қилади, деб таъкидланади ҳужжатда.
