Учрашувда хориж томонига Конституциявий ислоҳотлар, шунингдек, Ўзбекистонда амалга оширилаётган сиёсий ва ижтимоий-иқтисодий ўзгаришлар ҳақида маълумотлар берилди. Хусусан, янги таҳрирдаги Конституция лойиҳаси етакчи халқаро ташкилотлар, жумладан, ЕХҲТ ДИИҲБнинг ва Венеция комиссиясининг фикр ва тавсияларини инобатга олган ҳолда тайёрлангани қайд этилди.
Конституциявий қонун лойиҳасининг умумхалқ муҳокамаси чоғида 220 мингдан ортиқ таклиф келиб тушгани, уларнинг ҳар тўртинчиси лойиҳада ўз аксини топгани алоҳида таъкидланди.
Мулоқот давомида ЕХҲТ ДИИҲБ билан ўзаро ҳамкорлик истиқболлари, жумладан қонун ижодкорлиги жараёнини такомиллаштириш ва миллий сайлов тизимини янада модернизация қилиш соҳасида алоқаларни кенгайтириш бўйича фикр алмашилди.
Ўз навбатида, хорижий томон мамлакатда амалга оширилаётган демократик ислоҳотларни қўллаб-қувватлашини, Ўзбекистон Президенти Шавкат Мирзиёев томонидан амалга оширилаётган ислоҳотларни илгари суришда ҳамкорликни янада ривожлантиришга ҳар томонлама ҳисса қўшишга тайёрлигини таъкидлади, деб хабар беради Олий Мажлис Сенати матбуот хизмати.
Учрашув якунлари бўйича томонлар тизимли мулоқотни ва ҳамкорликни давом эттиришга келишиб олдилар.
