Қувонарлиси, ушбу турнирда ҳамюртимиз Дарья Резниченко узунликка сакраш мусобақаларида Токио-2020 нормативини бажарди. У ушбу йўналишда 6 метру 83 сантиметр натижа қайд этди. Бу Токио-2020 нормативидан 1 сантиметрга юқори кўрсаткич саналади.
Маълумот учун: Дарья Резниченко ушбу натижа билан очиқ ҳаводаги Ўзбекистон рекордини 2 сантиметрга, ёпиқ иншоотлардаги мамлакат рекордини эса 1 сантиметрга янгилади.
Шунингдек, мазкур халқаро турнирнинг уч ҳатлаб сакраш дастурида иштирок этган икки ҳамюртимиз ҳам Токио-2020 нормативларини бажаришга муваффақ бўлди.
Жумладан, Осиё чемпиони, қолаверса Осиё ўйинлари совриндори, ҳамюртимиз Руслан Курбанов ўз чиқишида 17.17 метр натижа қайд этди. Бу Олимпиада нормативидан 3 сантиметр юқори кўрсаткичдир.
Қизлар ўртасидаги мусобақаларда Роксана Худоёрова нормативдан 4 сантиметр юқори натижа, яъни 14.36 метрга сакради.
Эслатиб ўтамиз, бунгача енгил атлетика бўйича Ўзбекистон терма жамоаси аъзоларидан баландликка сакраш баҳсларида Светлана Радзивил ҳамда Сафина Саъдуллаева, босқон улоқтиришда Суҳроб Хўжаев Олимпиада нормативларини бажаришган эди, деб хабар беради Туризм ва спорт вазирлиги матбуот хизмати.
