Tanqidchilarning fikricha, ushbu qonun ommaviy axborot vositalari erkinligini cheklaydi va Gruziyaning Yevropa Ittifoqiga qoʻshilish imkoniyatlarini xavf ostiga qoʻyishi mumkin.

Hukumatning ushbu qonuni 3,7 millionlik Janubiy Kavkaz davlatini beqarorlashtirishga urinayotgan zararli xorijlik ishtirokchilarni toʻxtatish uchun zarurligi taʼkidlanmoqda. Biroq koʻplab gruziyalik jurnalistlar va faollarning aytishicha, qonun loyihasining asl maqsadi ularni qoralash va munozaralarni cheklashdir.

Muxoliflar qonunni «Rossiya qonuni» deb qoraladi. Sababi u Kreml tomonidan mustaqil axborot vositalari, notijorat tashkilotlar va faollarni bostirish choralariga oʻxshaydi. Tanqidchilarga koʻra, bu chora Gruziyaning Gʻarb bilan yanada integratsiyalashuv imkoniyatlarini toʻxtatish uchun Moskva tomonidan qilingan boʻlishi mumkin.

Parlament spikeri Papuashvili qonun loyihasini imzolaganidan soʻng uning asosiy maqsadi «Gruziya siyosiy, iqtisodiy va ijtimoiy tizimlarining tashqi aralashuvga qarshiligini oshirish» ekanligini aytdi. «Agar nodavlat tashkilotlar va ommaviy axborot vositalari qarorlar qabul qilish jarayonida ishtirok etmoqchi boʻlsa va Gruziya xalqi hayotiga xorijiy hukumatlar tomonidan moliyalashtirilgan mablagʻlar hisobidan taʼsir oʻtkazmoqchi boʻlsa, ular shaffoflikning minimal standartiga javob berishi, jamoatchilik har bir «aktyor» ortida kim turganini bilishi kerak». – dedi u.

Endilikda, qonunga binoan, 60 kun ichida «chet el agentlari» reyestri tuziladi. Reyestrga 20 foizdan ortigʻi xorijdan turib moliyalashtiriladigan barcha notijorat yuridik shaxslar va ommaviy axborot vositalari kiritiladi. Ular yillik moliyaviy hisobotini eʼlon qilib borishi kerak boʻladi.

Yevropa Ittifoqining tashqi siyosat boʻlimi, qonunning qabul qilinishi Gruziyaning Yevropa Ittifoqi yoʻlidagi taraqqiyotiga salbiy taʼsir koʻrsatishini aytdi.