MIB organlari tomonidan koʻrilgan chora-tadbirlar natijasida, joriy yilning 9 oyi davomida, jami 35,2 trln. soʻm mablagʻlar undirildi. Amalda umumiy undiruv koʻrsatkichi oʻtgan yilning shu davriga nisbatan 6,6 trln soʻmga yoki 23 foizga oshdi.
Birgina, davlat foydasiga 14,9 trln soʻm, tadbirkorlik va boshqa subyektlar foydasiga 18,8 trln. soʻm hamda fuqarolarimiz manfaatlari uchun 1,4 trln. soʻmdan ziyod undiruvlar amalga oshirildi.
Byuroning axborot texnologiyalari yordamida masofaviy ishlaydigan 15 ta tumanlararo boʻlimlari tomonidan majburiy ijro harakatlari oʻtkazilmasdan va fuqarolarning mol-mulklariga daxl qilmagan holda, 588,6 mlrd. soʻmlik 1,6 mln.ta hujjatlarning ijrosi taʼminlandi.
Ijtimoiy ahamiyatga ega boʻlgan — “Temir daftar”, “Ayollar daftari” va “Yoshlar daftari” bilan bogʻliq jamgʻarmalariga 798 mlrd. soʻm yoki oʻtgan mos davrga nisbatan 121 mlrd. soʻm koʻp mablagʻ yoʻnaltirildi.
Moddiy yordamga muhtoj farzandlar foydasiga jami 1,4 trln. soʻm aliment pullari undirilgan.
“Aliment toʻlovlari” jamgʻarmasi hisobidan 1.492 nafar undiruvchilar foydasiga voyaga yetmagan farzandlarining moddiy taʼminoti uchun 31,3 mlrd soʻm mablagʻlar toʻlab berildi.
Ishsiz aliment toʻlovchilarning 19 ming 638 nafari ishga joylashtirildi, 10 mingdan ortiq oilalarning yarashtirilishiga erishildi.
Qonunga xilof ravishda ishdan boʻshatilgan 570 nafar shaxslar ishga tiklanib, ularga toʻlanmasdan qolgan 30,6 mlrd. soʻmlik ish haqlari undirib berildi.
Ijro harakatlarini raqamlashtirish borasida joriy etilgan tizimlar imkoniyatlaridan samarali foydalanilmoqda. Jumladan, ijro ishi qoʻzgʻatilgani va qoʻllanilgan cheklovlar toʻgʻrisida qarzdorlarni ogohlantirish tizimi orqali 64 mln.ta “SMS-xabarnoma”lar yuborildi.
Qarzdorlik haqida oʻz vaqtida xabar berilishi natijasida, 1,5 mln.ta ijro ishlari ixtiyoriy muddatda tamomlandi. Shu bilan birga, Byuro organlariga kelib tushayotgan murojaatlar bilan ishlash borasida, har bir murojaat tanqidiy tahlil qilinib, bu borada muhim choralar koʻrilmoqda.
Faoliyatga oshkoralik berish va jamiyatda huquqiy madaniyatini yuksaltirish borasida 35 ming 300 dan ortiq huquqiy targʻibot tadbirlari oʻtkazilgan boʻlsa, 14 ming 700 ga yaqin tadbirlarni yoritishda ommaviy axborot vositalari imkoniyatlaridan foydalanildi.
Hozirda ham, faoliyatga ilgʻor tajribalarni keng joriy etish, ayniqsa ijro etish sohasini yanada raqamlashtirish masalalariga alohida eʼtibor qaratilmoqda.
