Davlat dasturida “yashil iqtisodiyot” tamoyillarini keng joriy qilish, ekologik jihatdan qulay va farovon yashash muhitini shakllantirish, aholining salomatligini yaxshilash, tabiiy resurslarni tejash va ulardan oqilona foydalanish, ekologik barqarorlikni taʼminlash va boshqa masalalarga alohida eʼtibor qaratilgan.

Deputatlar “Yashil makon” umummilliy loyihasi va “Mening bogʻim” loyihasi doirasida 200 million tup daraxt hamda butalar ekish, “Soyali sayr koʻchalari” tarmogʻini yaratish, Orol dengizi tubida 100 ming gektar “yashil maydon” barpo etish va Orolboʻyi mintaqasidagi oʻrmonzorlar 2,1 million gektarga, oʻrmon bilan qoplangan maydonlarni 4,1 million gektarga yetkazish boʻyicha belgilangan vazifalar fraksiya dasturiy maqsadlariga hamohang ekanligini taʼkidladilar.

Muhokamalardan soʻng, Davlat dasturi belgilangan vazifalar ijrosi yuzasidan tizimli ravishda deputatlik va jamoatchilik nazoratini amalga oshirib borishga kelishib olindi.

Navbatdagi masala — aholini qalbaki mahsulotlardan himoya qilish hamda raqamli markirovkalash tizimi takomillashtirishga qaratilgan qonun loyihasi boʻldi.

Ushbu qonun loyihasida tadbirkorlarga markirovka qurilmalarini sotib olish xarajatlari summasiga foyda, aylanmadan olinadigan soliq va yakka tadbirkorlar uchun daromad soligʻini kamaytirish huquqi berilmoqda. Shuningdek, pivo mahsulotlarini sotish faoliyati soliq organlarini xabardor qilish tartibida amalga oshiriladigan faoliyat turlari roʻyxatiga kiritilyapti.

Fraksiya aʼzolarining aytishicha, qonun loyihasining qabul qilinishi raqamli markirovkalangan mahsulotlarning chakana savdosini amalga oshiruvchi tadbirkorlik subyektlari uchun yanada qulay shart-sharoitlar yaratish, soliq imtiyozlarining samarali qoʻllanilishi, yashirin iqtisodiyotning oldini olishga xizmat qiladi.

Yigʻilishda qonun loyihasi deputatlar tomonidan qoʻllab-quvvatlandi.