«Сизлар бошқаларга нисбатан интилганларингни, ўз эртанги кунингизга бефарқ бўлмаганингиз, ота-оналаринг сизларга тўғри йўл кўрсатгани учун мана шу катта давлатда кўп миллатли Ўзбекистон халқини вакили бўлиб юрибсизлар. Катта марраларни олиб, катта-катта даражаларга етишга қанот бойлаганларингни кўриб, мен ўзимга куч оламан», — деди давлат раҳбари.
«Миллат учун, мамлакат учун, халқ учун нима қилдинг ва сени қадамларингни халқ қабул қиляптими, деган савол мени ҳар сафар қийнайди. Етти-саккиз йилда қилган ислоҳотларимиз, янги Ўзбекистонни энг қуйи поғонасига маҳаллага тушиб, ҳар бир маҳаллада ёшлар вакилини ташкил қилганимиз, тадбиркорликни ривожлантирганимизнинг энг катта пировард мақсади халқимнинг манфаати, халқимнинг эртаги куни. Бизнинг қилган ишларимизни халқимиз қабул қиляпти», — деди президент.
Давлат раҳбари келгуси йили БМТ Бош Ассамблеясида буюк аждодлар ҳақида тақдимот ўтказишини айтди.
«Сизлар кечаги билан бугуннинг фарқига тез борасизлар. Агар эътибор берган бўлсаларинг, иккинчи марта Бирлашган Миллатлар Ташкилотида буюк боболаримиз Ислом маърифати тўғрисида гапирдим. Бухорий бобо қаерда бор? Мотуридий, Хоразмий бобо қаерда бор? Беруний қаерда бор? Келгуси йил Бош Ассамблеяда тақдимот ўтказамиз, дедим», — деди Шавкат Мирзиёев.
Президент, шунингдек, ёшлар радикализмдан йироқ бўлиши, Исломни эса инсонпарвар ва халқпарвар дин эканига ишонтириш кераклигини қайд этди.
«Диний маърифат бағрикенглик бўйича ҳам жуда кўп ишлар қиляпмиз. Айниқса ёшларимизнинг, мени жуда катта ташвишим — радикализмдан йироқроқ бўлиши, Исломнинг буюклигини, инсонпарварлигини, халқпарварлигини инонтириш, ишонтириш. Бир ярим ойдан кейин борсанглар, янги Ислом цивилизация марказини очилишида ўзларинг қатнашасизлар. Бу марказни нима учун қиляпман? Улуғ меросимизни, буюк боболаримиз, кимни биз меросхўри эканлигимизни, ўша масканга кирган инсон кўриб, таъзим қилиб чиқиб кетиш учун қиляпман», — деди президент.
Давлат раҳбари ёшларнинг билими денгиздан узоқ Ўзбекистон учун кўприк вазифасини ўташини таъкидлади.
«Биз денгиздан узоқроқмиз, лекин учта-тўртта мамлакат, денгизга боришимиз учун битта кўприк бор — ёшларнинг билими. Ёшларимнинг таълими, фанга берган эътиборимиз, у кўприк учта-тўртта давлатга боришни ҳам қисқартиради. Нима у? Битта нарса — билим, таълим. Муаллим, муаллим, муаллим, таълим, таълим, таълим, деб мен нимага кўп гапираман? Шу нарса бизнинг ривожланишимизга замин яратади. Муаллимсиз, таълимсиз, билимсиз янги Ўзбекистонни қуриб бўлмайди», — деди президент.
