FIDE Жаҳон кубоги–2025 мусобақасида ўзбекистонлик шахматчилар муваффақиятли иштирок этмоқда. Бошланғич босқичда юртимиз шарафини ҳимоя қилган 5 нафар спортчидан 3 нафари — Суяров Муҳаммадзоҳид, Нодирбек Абдусатторов ва Шамсиддин Воҳидов мусобақани муддатидан олдин тарк этган эди.
21–22 ноябрь кунлари ярим финал босқичида икки ҳамюртимиз — Нодирбек Якуббоев (2689 рейтинг, 37-ўрин) ва Жавоҳир Синдоров (2721 рейтинг, 25-ўрин) ўртасидаги икки партия 1:1 ҳисоби билан дурранг якунланганди. Шунингдек, Хитой вакили Вей И (2752 рейтинг, 11-ўрин) ҳамда россиялик Андрей Есипенко (2681 рейтинг, 41-ўрин) баҳси ҳам дурранг бўлган.
23 ноябрь куни бўлиб ўтган тай-бек учрашувларида Жавоҳир Синдоров Нодирбек Якуббоевни 2,5:1,5 ҳисоби билан мағлуб этиб, Жаҳон кубоги–2025 мусобақасининг дастлабки финалчисига айланди.
Бу юксак натижа туфайли 19 ёшли шахматчимиз 2026 йилда ўтказиладиган ФИДE Номзодлар турнирига ҳам йўлланма олди. У эндиликда жаҳон чемпиони унвони учун кураш олиб бориш имкониятига эга бўлади.
