Жерлеў имаратларының қурылысы айрықша қызығыўшылық туўдырады. Естелик
аймағында 19 дана тас қуты қәбирлер анықланып, оларда бүкирейген ҳалда
жерленгенлер бар екенлиги анықланды. Жерленгенлердиң қалдықлары менен бирге ҳәр
қыйлы жерлеў буйымлары, соның ишинде, бронза ҳәм моншақтан исленген буйымлар
табылған.
Табылған комплекс Хорезмниң әййемги тарийхын үйрениўде үлкен илимий
қызығыўшылық оятады. Қәбир естеликлери әййемги халықтың материаллық мәденияты,
жерлеў мәресимлери, социаллық көзқараслары, аймақлар аралық байланыслары
ҳаққында әҳмийетли мағлыўматларды алыў имканиятын береди.
Жерлеў
мәресиминиң ҳәм айырым түрдеги табылмалардың дәслепки анализи Қубла Қазақстан
аймағынан ҳәм Сырдәрья бассейнинен табылған археологиялық естеликлер менен
белгили бир уқсаслықларды көрсетеди. Бул параллельлер айрықша илимий
қызығыўшылық туўдырады ҳәм бронза дәўиринде Орайлық Азияның түрли аймақлары
халқы арасында мәдений байланыслар ҳәм уқсас дәстүрлер бар екенлигинен дәрек
бериўи мүмкин.
Соның менен
бирге, табылған естеликтиң хронологиясы ҳәм мәдений тийислилиги ҳаққындағы
үзил-кесил жуўмақлар археологиялық материаллар комплексли үйренилгеннен соң
шығарылады.
Ҳәзирги ўақытта
Академия қәнигелери тәрепинен экспедиция даўамында алынған материалларды
бирлемши қайта ислеў ҳәм ҳүжжетлестириў жумыслары алып барылмақта. Келешекте
жерлеў имаратлары, антропологиялық материаллар ҳәм олардың инвентарьларын толық
үйрениў, зәрүр лабораториялық тексериўлер өткериў режелестирилген.
Алынған
нәтийжелер естеликтиң тарийхын анықлаў, оның Хорезм ҳәм оған тутас аймақлардағы
бронза дәўирине тийисли археологиялық мәдениятлар системасындағы орнын анықлаў
имканиятын береди.
