Экспорт имканиятларын кеңейтиў де турақлы раўажланыўдың және бир әҳмийетли факторы болып табылады. Буның ушын халықаралық стандартларға жуўап беретуғын өним ҳәм хызметлер жаратыў, логистиканы раўажландырыў, басқа мәмлекетлер менен саўда байланысларын жақсылаў зәрүр. Экономикалық өсиў тек ғана макроэкономикалық көрсеткишлерге емес, ал адамлардың турмыс дәрежесин арттырыўға да бағдарланыўы керек. Жумыс орынларын жаратыў, киши ҳәм орта бизнести қоллап-қуўатлаў, аўыл хожалығы ҳәм хызмет көрсетиў тараўын раўажландырыў - булардың барлығы кәмбағаллықты қысқартыў ҳәм халықтың дәраматларын арттырыўға хызмет етеди.
Бай ресурс ҳәм интеллектуаллық потенциалға, стратегиялық жайласыўға ийе Өзбекстан ушын бул жол дүнья көлеминде өз абырайын беккемлеў, ҳәр бир пуқараның мүнәсип турмысын тәмийинлеў имканиятын береди. Сонлықтан, бул бағдарда комплексли илажлардың әмелге асырылыўына айрықша итибар қаратып келмекте.
Президентимиз быйыл 4-март күни кәмбағаллықты қысқартыў ҳәм халықтың бәнтлигин тәмийинлеў, инвестиция ҳәм экспорт көрсеткишлери бойынша есабат пенен танысыў процесинде жыл басынан халықтың бәнтлигин тәмийинлеў бойынша жаңа система енгизилгенин атап өтти.
Атап өтилгениндей, өткен дәўирде 208 район ҳәм қала ҳәкимлери және банклердиң басшылары арасында бул бағдарда бирге ислесиў шәртнамаларына қол қойылды. Банк филиалларында мәҳәлле кесиминде ислесиў бөлимлери шөлкемлестирилип, оларға мәҳәлле банкирлери тайынланды. Нәтийжеде январь айында 239 мың, февраль айында 480 мың халық дәраматлы мийнетке тартылды.
- Өткен еки айда инвестиция ҳәм экспорт көрсеткишлери де унамлы болды. Тек ғана февраль айында республикамызға 3 миллиардтан аслам сырт ел инвестициясы тартылды, - дейди Бас министрдиң орынбасары Жамшид Хўжаев. - Мәмлекетимиз басшысына ҳәр бир аймақ, қала, район және министрлик ҳәм уйымлардың инвестицияларды тартыў және өзлестириў дәрежеси бойынша есабат берилди.
Қуўанышлы тәрепи, бул бағдарда өткен жылдың усы дәўирине салыстырғанда 40 процентке өсиўге ерисилген. 14 тен аслам қала еки айда 50 миллионнан аслам сырт ел инвестициясын тартқан. Февраль айында исбилерменлер өз бағдарлары бойынша инвестицияларды тартыў бойынша Малайзия, Индонезия, Кувейт, Қытай ҳәм Грузия сыяқлы бир қатар мәмлекетлерге хызмет сапарлары менен барды. Нәтийжеде баҳасы 12 миллиард доллардан аслам 128 перспективалы жойбарға қол қойылды. Соның менен бирге, мәмлекетимизге де 40 тан аслам мәмлекеттиң ири исбилермен топарларының ўәкиллери келди. Олар тәрепинен 50 ден аслам шәртнамаға қол қойылды.
Буннан тысқары, жаңа жойбарларды әмелге асырыўда ҳәр бир район, қаланың экономикалық потенциалынан келип шығып, сырт елдеги саўда-экономикалық мәсләҳәтшилер тәрепинен оғада үлкен сөйлесиўлер өткерилмекте. Әҳмийетлиси, сырт елли инвесторларды, исбилерменлерди Өзбекстанға алып келиў, ҳәр бир аймақтың тартымлылығын көрсетиў ушын жүзден аслам презентация өткерилди.
Сондай-ақ, биринши шерек жуўмағы менен 8 миллиард доллардан аслам сырт ел инвестициясын өзлестириў режелестирилген. Онда банклер тәрепинен сырт ел кредит линияларын бериўди жеделлестириў, халықаралық финанс институтларын тек ғана мәмлекетлик кепиллик арқалы емес, ал тиккелей бизнеске қаратыў арқалы әмелге асырыў бойынша да бир қатар илажлар белгиленген.
- Кәмбағаллықты қысқартыў ҳәм халықты жумыс пенен тәмийинлеўде төрт тәжирийбе әҳмийетли тийкар болмақта, - дейди кәмбағаллықты қысқартыў ҳәм бәнтлик министри Ботир Зоҳидов. - Мәҳәлле банкирлери ҳәм ҳәким жәрдемшилери менен биргеликте февраль айының өзинде мәҳәллелерде 49 мың киши микрожойбарды әмелге асырыў арқалы 103 мың пуқара дәраматлы жумысқа тартылды. Соған қарамастан, айырым аймақларда немқурайдылықлар да бар.
Буннан тысқары, киши ҳәм орта бизнести қаржыландырыў мақсетинде 8,6 триллион сум жумсалды. Жыл басынан киши ҳәм орта бизнеске жәми 14 триллион сум кредит қаратылды. Соның ишинде, исбилерменлик бағдарламалары шеңберинде 2 триллион сум ажыратылды. Адамларға дәрамат табыў имканиятлары, таяр бизнес жойбарлар таныстырылып, оларды әмелге асырыў жоллары үйретилмекте. Жумыслы болғанлар Салық комитетинде тастыйықланбақта.
Ҳәзирги ўақытта алдымызда турған әҳмийетли ўазыйпалардан бири - қыйтақ жер ҳәм ижараға берилген аўыл хожалығы жерлеринен алынған дәраматларды арттырыў, экспортқа қолайлы егинлер егиў мақсетинде жаңа система тийкарында жумыс басланды. Усы мақсетте 9 мыңнан аслам мәҳәллеге 1921 жетекши исбилермен бириктирилмекте. Мақсет - жақсы туқым ҳәм нәллерди халыққа кооперация тийкарында тарқатыў, жетистирилген өнимди сатып алыў базарын кепиллеў.
Соның менен бирге, бәҳәр мәўсиминде қыйтақ жер ҳәм ижара жерлерде егин егиў, оны online-mahalla.uz платформасы арқалы бақлап барыў бойынша көрсетпелер берилди.
Лутфулла СУВОНОВ,
“Янги Ўзбекистон” хабаршысы
