Ушырасыўда тәреплер өз-ара интеграцияласқан транспорт-логистика системасын жаратыў, регионаллық бирге ислесиўди беккемлеў ҳәм биргеликтеги жойбарларды әмелге асырыў мәселелерин додалады.
Министр Илҳом Маҳкамов Өзбекстан транспорт-логистика ҳәм жол инфраструктурасы тараўында мәмлекетлер арасындағы стратегиялық шерикликти жаңа басқышқа алып шығыўға таяр екенин билдирди.
"Өзбекстан - Түркменстан - Иран - Түркия" халықаралық мультимодаль коридорын раўажландырыўға тийкарғы ўазыйпа сыпатында айрықша итибар қаратылды. Сондай-ақ, министр қурылып атырған жаңа "Қытай - Қырғызстан - Өзбекстан" темир жолын Иран ҳәм Түркия арқалы әмелдеги халықаралық транспорт коридорларына интеграциялаў зәрүрлигин атап өтти.
И.Маҳкамов Қубла жөнелисте жүк тасыў көлемин арттырыў ушын жөнелис бойлап барлық мәмлекетлердиң транспорт инфраструктурасын ҳәм транзит имканиятларын өз-ара муўапықластырып раўажландырыў әҳмийетли екенин атап өтти.
Транзит потенциалынан нәтийжели пайдаланыў ҳәм миллий тасыўшылар ушын теңдей шараятлар жаратыў мақсетинде Өзбекстан:
бизнес ўәкиллерин тартқан ҳалда жөнелис бойынша жүк тасыўдың машқалалы мәселелерин үйрениў ҳәм таллаў;
транспорт инфраструктурасын раўажландырыў ҳәм транзит имканиятларын арттырыў бойынша биргеликтеги бағдарламаны ислеп шығыў;
жүк тасыўда санлы ҳүжжетлерди өз-ара алмастырған ҳәм тән алған ҳалда енгизиў;
алдын ала хабардар етиў системасын енгизген ҳалда шегаралардан өтиўди максимал дәрежеде әпиўайыластырыў.
Тәреплер бирге ислесиўди избе-из даўам еттириў ҳәм кейинги қәдемлерди белгилеў мақсетинде экспертлер дәрежесинде Жумысшы топарды дүзиўге келисип алды.
