Форум Орайлық Азия мәмлекетлериниң мәмлекетлик уйымлары, бизнес, илимий жәмийетшилик ҳәм мәмлекетлик емес шөлкемлердиң ўәкиллерин жыйнады. Оның тийкарғы мақсети санаат экологиясы ҳәм турақлы раўажланыўдың әҳмийетли мәселелерин додалаў ушын регионаллық платформа жаратыўдан ибарат еди. Ең жақсы қолайлы технологияларды енгизиў, экологиялық процесслерди санластырыў, шығындыларды басқарыў системаларын раўажландырыў, ашық-айдынлықты тәмийинлеў ҳәм пуқаралық жәмийетин тартыўда мәмлекетлик емес шөлкемлердиң ролин күшейтиў мәселелерине айрықша итибар қаратылды.
Жалпы мәжилисте Экология министриниң кеңесгөйи Алишер Саломов шығып сөйлеп, Президент Шавкат Мирзиёевтиң басшылығында Өзбекстанда "жасыл" экономиканы қәлиплестириў ҳәм тәбийғый ресурслардан ақылға уғрас пайдаланыўға қаратылған кең көлемли реформалар әмелге асырылып атырғанын атап өтти.
"2025-жыл Өзбекстанда "Қоршаған орталықты қорғаў ҳәм жасыл экономика жылы" деп жәрияланғаны экологиялық күн тәртибиниң әҳмийетлилигин көрсетеди. Қоршаған орталықты қорғаў, шығындыларды басқарыў, жасыл энергетиканы раўажландырыў ҳәм ESG стандартларын енгизиўди өз ишине алған мәмлекетлик бағдарлама тастыйықланды. Мақсетимиз - 2030-жылға шекем шығындыларды қайта ислеў үлесин 60 процентке, "жасыл" энергетиканың үлесин 54 процентке жеткериў", - деди А.Саломов.
Сондай-ақ, шығындыларды басқарыў ҳәм айланба экономиканы раўажландырыў агентлигиниң шөлкемлестирилгени, 23 миллионнан аслам халықты қамтып алған "Таза мәкан" электрон биллинг системасының енгизилгени, халықаралық инвесторлардың жәрдеминде заманагөй шығындыларды қайта ислеп, энергия ислеп шығарыў заводларын қурыў жойбарлары ҳаққында айтып өтти. 2025-жыл март айында Өзбекстанның Орхус конвенциясына қосылыўы, ғалабалық акция ҳәм кампаниялар арқалы халықтың экологиялық мәдениятын жедел раўажландырыўға айрықша итибар қаратылды.
Сөзиниң жуўмағында Алишер Саломов форум қатнасыўшыларын Глобал экологиялық қорының 8-ассамблеясы шеңберинде Самарқандта болып өтетуғын "Eco Expo Central Asia 2026" халықаралық көргизбесине барыўға мирәт етти.
Форум бағдарламасына аймақта экологиялық технологиялар енгизилип атырған кәрханаларға индустриаллық саяхат, инновациялық "жасыл" шешимлер көргизбеси киргизилди. "Экология ҳәм өндирис: турақлы келешекке қарай жол" атамасындағы жалпы мәжилисте экономикалық өсиў ҳәм экологиялық қәўипсизлик арасындағы тең салмақлылық, экологиялық басламаларды әмелге асырыў, глобаллық ҳәм миллий мақсетлерге ерисиўде ири компаниялардың орны додаланды.
-Павлодар форумы санаат экологиясы тараўында тәжирийбе алмасыў ҳәм биргеликтеги шешимлерди ислеп шығыў ушын әҳмийетли регионаллық майданға айланды. Өзбекстанның қатнасыўы "жасыл" трансформация, айланба экономиканы раўажландырыў ҳәм қоршаған орталықты қорғаў тараўында халықаралық бирге ислесиў мәселелеринде Өзбекстанның жедел позициясын атап өтти.
