Учрашувда Фарғона пахта-тўқимачилик саноати маҳсулотларини Германия ва Европа бозорларига чиқиш имкониятларини кенгайтириш, бунинг учун вилоятга тўғридан-тўғри хорижий инвестицияларни жалб қилиш масалалари муҳокама қилинди.
Мулоқотда Ўзбекистон ва Германия муносабатлари турли йўналишларда мустаҳкамланиб бораётгани, хусусан, Фарғона вилояти билан Германия ўртасида ҳамкорлик алоқалари делегациялар ташрифи доирасида яхши йўлга қўйилгани таъкидланди.
Германия трикотаж ишлаб чиқарувчилар конфедерацияси бош менеджери Силвиа Жангбауер, Германия томонидан молиялаштириладиган лойиҳа орқали замонавий технологиялар билан ишлай оладиган ишчи-мутахассисларни ўқитиш, вилоятимизда ишлаб чиқарилаётган тайёр текстиль маҳсулотларини сертификатлаш, халқаро бозорда рақобатбардошликни ошириш жараёнларида учраётган мавжуд муаммоларга ечим топишда амалий кўмак кўрсатиш мақсад қилинганига эътибор қаратди.
Вилоят раҳбари Хайрулло Бозоров таклифи билан германиялик тадбиркорларни Фарғона вилоятига олиб келиш, толадан тайёр маҳсулотгача бўлган замонавий ишлаб чиқариш занжирини шакллантиришда улар билан ҳамкорлик бўйича чора-тадбирларни ишлаб чиқиш ва тез фурсатларда ҳамкорлик келишувини имзолаш режалаштирилди, деб хабар беради Фарғона вилоят ҳокимлиги матбуот хизмати.
