Учрашувда Фарғона вилояти ва Венгрия ўртасида икки томонлама савдо-иқтисодий ҳамкорлик имкониятлари, замонавий қишлоқ хўжалиги, саноат, банк-молия, фармацевтика, таълим ва бошқа қатор йўналишларда ҳамкорлик истиқболлари муҳокама этилди.
Мулоқот чоғида икки Давлат раҳбарларининг яқин, ўзаро ишончга асосланган муносабатлари сўнгги йилларда Ўзбекистон ва Венгрия ўртасидаги кўплаб соҳаларда алоқалар ривожланиб бораётганининг асосий омили бўлаётгани алоҳида таъкидланди.
Венгр жамиятида, ишбилармон доиралари ўртасида Ўзбекистонга қизиқиш катта эканини қайд этган элчи Ковач, ўзининг вилоятимизга илк ташрифи Фарғона вилояти ва Венгрия ўртасида самарали ҳамкорликнинг тамал тошини қўйишидан умидвор эканини билдирди.
Учрашувда Фарғона вилояти ва Венгрия ҳудудлари ўртасида савдо-иқтисодий ва инвестицион алоқаларни ривожлантиришга қаратилган «Йўл харитаси» ишлаб чиқишга келишиб олинди.
Фарғона вилояти ҳокимлиги ва вилоят ишбилармонлари делегациясининг Венгрияга режалаштирилган сафари дастурини ишлаб чиқиш ҳамда уни ўзаро манфаатли натижалар билан амалга ошириш бўйича ҳамкорликда иш ташкил этишга келишилди.
Венгрия қишлоқ хўжалиги ва табиий фанлар университети билан янги ташкил этилаётган Қўқон озиқ-овқат технологияси ва муҳандислиги халқаро институти ўртасида ҳамкорлик ўрнатиш бўйича ҳамфикрлиликка борилди.
Учрашувда вилоят ҳокимининг ўринбосари Иқболжон Эргашев ҳамда Венгриянинг Ўзбекистондаги элчихонаси савдо-иқтисодий масалалар бўйича вакили Янош Ваник иштирок этди, деб хабар беради Фарғона вилоят ҳокимлиги матбуот хизмати.
