Сардоба тумани Дўстлик маҳалласидаги 37 та, Мирзаобод тумани Навбаҳор маҳалласидаги 18 та ва Ҳақиқат маҳалласидаги 40 та янги қурилган кўп қаватли уйлардаги хонадонларга замонавий телекоммуникация хизматларини (телефон алоқаси, интернет, IP-телевидение хизматлари) кўрсатишни ташкил этиш мақсадида кўп қаватли уйлар орасига 2,87 километр алоқа қувурлари ётқизилди, 11,45 километр алоқа тармоқлари қурилди, 132 та 3168 портли замонавий телекоммуникация қурилмалари ўрнатилди.
Оқолтин тумани, Саховат МФЙдаги 14 мактабга замонавий компьютерлар тақдим этилди. Информатика хонасида масофавий онлайн таълим ташкил этилди.
Маҳалла ҳудудида қуриб битказилган кутубхонага замонавий компьютерлар тақдим этилди. Кутубхонада юқори тезликдаги интернет хизмати ҳамда Wi-Fi ҳудуд ташкил этилиб, китобхонлар учун Алишер Навоий Миллий кутубхонанинг ахборот-кутубхона фондига ва етакчи хорижий ахборот-кутубхона ресурслари фондларига онлайн тарзда кириш имконияти яратилди.
Шунингдек, яқинда Мирзаобод тумани «Навбаҳор» маҳалласи ҳудудида янги ва замонавий «Навбаҳор» почта алоқа бўлими фойдаланишга топширилди. Мазкур почта алоқа бўлими аҳолига замонавий почта хизматларини кўрсатиш ва қулайликлар яратиш мақсадида юқори тезликдаги интернет, компьютер ва инфокиоск қурилмалари билан таъминланиб, у ерда анъанавий почта хизматлари, тезкор почта хизмати, электрон пул ўтказмалари, даврий нашрлар сотуви, обуна ҳамда юридик ва жисмоний шахслардан коммунал тўловларни қабул қилиш каби 40 дан зиёд хизмат турлари йўлга қўйилди, деб хабар беради Ахборот технологиялари ва коммуникацияларини ривожлантириш вазирлиги матбуот хизмати.