Йиғилишда вазирликлар ва идоралар, тармоқ бирлашмалари ҳамда Қорақалпоғистон Республикаси, вилоятлар ва Тошкент шаҳар маҳаллий ҳокимият органлари раҳбарлари иштирок этди.
Тасдиқланган дастурга мувофиқ жорий йил ўтган даврида маҳаллийлаштириш дастури доирасида 24,3 триллион сўмлик импорт ўрнини босувчи маҳсулотлар ишлаб чиқарилгани қайд этилди. Электрон кооперация портали орқали 7,9 триллион сўмлик 36,6 мингта ҳамкорлик шартномалари имзоланди, улар доирасида бугунги кунда 3,7 триллион сўмлик маҳсулот тўлиқ етказиб берилди.
Қорақалпоғистон Республикаси, Жиззах, Сирдарё, Самарқанд, Сурхондарё, Наманган, Фарғона, Андижон ва Хоразм вилоятларида ўтказилган ҳудудий тармоқлараро саноат ярмаркалари давомида 2,8 триллион сўмлик 6,3 мингта шартнома имзоланди ва 220 га яқин техник ҳамкорлик меморандумлари имзоланди.
Шу билан бирга, маҳаллийлаштириш дастурини амалга ошириш, мамлакатимизда аналоглари ишлаб чиқарилаётган маҳсулотлар импортини камайтириш, электрон кооперация портали орқали тузилган шартномалар шартларини бажариш, шунингдек йирик саноат корхоналарида импортга боғлиқлик даражасини пасайтириш билан боғлиқ долзарб масалалар конструктив тарзда муҳокама этилди.
Тармоқ бирлашмалари ва маҳаллий ҳокимият органларининг масъул раҳбарлари юқоридаги барча йўналишлар доирасида амалга оширилган ишлар ҳамда яқин ва ўрта муддатли истиқболдаги режалари тўғрисида батафсил ҳисоботларни тақдим этдилар. Уларга камчиликларни бартараф этиш ва ўз вақтида маҳаллийлаштириш дастурини амалга ошириш, 2023-2024 йилларда тармоқлар ва ҳудудлар кесимида импорт ўрнини босувчи маҳсулотларнинг янги турларини ишлаб чиқаришни назарда тутувчи маҳаллийлаштириш дастурини ишлаб чиқиш бўйича топшириқлар берилди.
Алоҳида тартибда жорий йил ноябрь ойида Тошкент шаҳрида Республика тармоқлараро саноат ярмаркасини ташкил этиш масаласи кўриб чиқилди, деб хабар беради Инвестициялар ва ташқи савдо вазирлиги матбуот хизмати.
