Бу ҳақда холдинг матбуот хизмати хабар берди.
Хабарда айтилишича, Брюсселда Ўзбекистон Республикаси Президенти Шавкат Мирзиёев бошчилигида ўтган бизнес музокараларда “Škoda Group” бош директори Петр Новотний ҳам иштирок этган.
Учрашувда Ўзбекистон ва Европа саноат етакчилари ўртасидаги ҳамкорликни ривожлантириш, айниқса, транспорт инфратузилмасини модернизация қилиш масалалари муҳокама қилинди.
“Юқори даражадаги мулоқотлар Европа технологияси ва тажрибаси Ўзбекистонда барқарор транспорт инфратузилмасини ривожлантиришга катта ҳисса қўшиши мумкинлигини кўрсатмоқда”, — деди Петр Новотний.
Учрашув чоғида “Škoda Group” Ўзбекистон бозорига қўшма корхона орқали кириш бўйича ўз стратегиясини тақдим этган.
Лойиҳа доирасида компания қуйидаги уч асосий йўналишда иш олиб боришни режалаштирмоқда:
- темирйўл транспорт воситаларини маҳаллий йиғиш;
- уларнинг бутун хизмат даври давомида техник хизмат кўрсатиш ва таъмирлаш;
- маҳаллий мутахассислар тайёрлаш учун “Škoda академияси”ни ташкил этиш.
Петр Новотнийга кўра, бу йўналишлар Европа Иттифоқи ва Ўзбекистон ўртасида имзоланган Кенгайтирилган шериклик ва ҳамкорлик тўғрисидаги янги битим ҳамда Global Gateway стратегияси мақсадларига мос келади.
Шунингдек, учрашув доирасида Ўзбекистон транспорт вазири Илҳом Маҳкамов ва “Škoda Group” вакиллари икки томонлама музокаралар ўтказиб, темирйўл ва шаҳар транспортини ривожлантириш бўйича аниқ қадамларни муҳокама қилди.
Президент Шавкат Мирзиёев “Škoda Group” компаниясининг Ўзбекистон транспорт соҳасини ривожлантиришдаги ҳиссасини, хусусан, Европа технологияси ва ноу-хауни жорий этишини юқори баҳолади ҳамда компаниянинг мамлакатдаги узоқ муддатли фаолиятини қўллаб-қувватлашини билдирди.
Учрашувда компаниянинг Марказий Осиё ва Жанубий Кавказ бўйича савдо бўйича вице-президенти Роман Соркин ҳам иштирок этди. У Европа комиссияси, Европа инвестиция банки ва бошқа ҳамкорлар билан ўзаро алоқаларни ривожлантириш ишларини мувофиқлаштириб келмоқда.
Маълумот учун, мазкур музокаралар Европа Иттифоқи ва Ўзбекистон ўртасида имзоланган Кенгайтирилган шериклик ва ҳамкорлик тўғрисидаги битим (EPCA) доирасида ўтказилди. Ҳужжат инвестициялар, транспорт, энергетика, савдо ва барқарор ривожланиш соҳаларидаги ҳамкорлик учун янги ҳуқуқий асосни яратади.
Лойиҳаларни молиялаштириш Европанинг Инвестиция банки (EIB) ва Европа комиссиясининг Халқаро шерикликлар бошқармаси (DG INTPA) томонидан амалга оширилади.
