Жорий йил 26 сентябрда Марказий сайлов комиссиясида Ўзбекистон Республикаси Олий Мажлиси Қонунчилик палатаси ва халқ депутатлари Кенгашлари сайловини кузатиш мақсадида мамлакатимизга ташриф буюрган МДҲ Парламентлараро ассамблеяси вакиллари иштирокида учрашув бўлиб ўтди.
Учрашувда МДҲ Парламентлараро ассамблеяси Кенгаши бош котиби маслаҳатчиси С.Караваев ҳамда МДҲ ПА иштирокчи давлатларда демократиянинг ривожланиши, парламентаризм ва фуқароларнинг сайлов ҳуқуқларига риоя этилишини мониторинг қилиш халқаро институти (ДРМХИ) эксперти С.Ткаченко иштирок этди.
Учрашувда Марказий сайлов комиссияси раиси З.Низамходжаев МДҲ Парламентлараро Ассамблеяси билан конструктив ҳамкорлик йўлга қўйилганини таъкидлади.
Қайд этиб ўтилганидек, сайловнинг ҳуқуқий асосларини такомиллаштиришда халқаро ташкилотлар, сайловни кузатиш миссиялари, хусусан, МДҲ ПАнинг тавсияларини миллий қонунчилигимиз ва амалиётимизга татбиқ этиш муҳим аҳамият касб этяпти.
Шунингдек, учрашувда жорий йил 27 октябрда мамлакатимизда бўлиб ўтадиган Ўзбекистон Республикаси Олий Мажлиси Қонунчилик палатаси ва халқ депутатлари Кенгашлари депутатлари сайловлари аралаш сайлов тизими асосида ўтказилиши ва унинг ўзига хос хусусиятлари, миллий сайлов амалиётига татбиқ этилган янгиликлардан яна бири “E-Saylov” ахборот тизими ва мазкур тизимнинг афзалликлари юзасидан батафсил маълумот бериб ўтилди.
Ўз навбатида миссия вакиллари бўлажак сайловларни умумэътироф этилган халқаро демократик тамойиллар асосида, юқори ташкилий даражада ўтишига муваффақият тилади.
Марказий сайлов комиссияси матбуот хизмати.
