Муборак тумани ҳудудидан ўтувчи «Муборак - Помуқ – Аланг - Нишон» автомобиль йўлининг 17 км.даги 1982 йили (зовур устида) қурилган кўприк носоз ҳолга келиб қолган эди, деб хабар қилади туман ҳокимлиги ахборот хизмати.
Таъкидланишича, ҳозирда кўприкдан ҳаракатланиш тўлиқ чекланган, ахборот берувчи йўл белгилари ўрнатилган ва автотранспорт ҳаракати учун вақтинчалик айланма йўл ташкил қилинган.
Бироқ шу йилнинг 16 февраль куни оғир автотранспорт воситаси айланма йўлдан юриш ўрнига, авария ҳолатидаги мазкур кўприкдан ҳаракатланган ва кўприк қулаб тушган. Содир бўлган ҳодисадан ҳеч ким зарар кўрмаган.
Мазкур кўприк Ўзбекистон Республикаси Президентининг «Йўл хўжалиги соҳасини янада такомиллаштириш чора-тадбирлари тўғрисида»ги 2023 йил 10 октябрдаги қарорининг 4-иловасига мувофиқ, 2024 йилда қайта қуриш белгиланган бўлиб, жорий йил 2-чорагида тўлиқ қайта қурилиб фойдаланишга топширилиши режалаштирилмоқда.
