Айтилишича, америкалик олимлар сичқонларда ўтказган тажрибаларига асосланиб кўп миқдорда шакар ва шакар маҳсулотлари истеъмол қилиш ичакнинг микробиома тизими бузилишига сабаб бўлишини маълум қилган. Ғарб мамлакатларидаги парҳез тартиби ичак яллиғланиши билан боғлиқ касалликлар келиб чиқиши хавфини оширади. Бу ҳақда олимларнинг ўрганишларига кўра, ичак яллиғланиши билан боғлиқ крона, йўғон ичак яллиғланиши касалликларига дунёнинг 3,5 миллиондан ортиқ аҳолиси чалинган.
Ичак яллиғланиши асосан Ғарб мамлакатларида кенг тарқалган. Тадқиқотлар ушбу касаллик 1980 йилдан буён болаларда ҳам кўп учраётганини кўрсатмоқда. Касаллик кенг тарқалишининг асосий сабаби қувватга бой таомларда шакар миқдорининг ҳаддан зиёд кўп бўлишида, деб изоҳланади. Маълумки, қайта ишланган ширинлик маҳсулотлари семизлик ва қандли диабет кассаликлари хавфини оширади.
Шакарнинг ичак касалликларини келтириб чиқариши мунозараларга сабаб бўлиб келмоқда. Гап шу ҳақда кетганда, юқорида айтилган сичқонлар тажрибасига қайтамиз. Америкалик биологларнинг бу тажрибасидан маълум бўлишича, кемирувчиларга юқори миқдордаги шакар маҳсулотлари берилганда йўғон ичак яллиғланишга мойиллик парҳездаги сичқонларникидан кўра юқорироқ бўлган. Уларда яллиғланиш жараёни 3 кундан сўнг бошланган. Мутахассисларнинг фикрича, шакар ичак микробиома таркибини ўзгартириб юборган.
Зуҳра ҚАРШИЕВА,
ЎзЖОКУ талабаси
