Ўзбекистоннинг BMB ZA’FARON компанияси Нидерландиянинг нуфузли Control Union Certifications ташкилотидан олган USDA ORGANIC сертификатининг амал қилиш муддатини узайтириб, ўз маҳсулотлари юқори халқаро стандартларга мувофиқлигини яна бир бор тасдиқлади.
Бу ҳақда "Дунё" АА хабар қилмоқда.
Европалик мутахассислар томонидан заъфарон плантацияларида ўтган йилги маҳсулотни экиш, етиштириш, агротехник тадбирларни ўтказиш, териб олиш, қайта ишлаш ва сақлаш, қадоқлаш жараёнлари тўлиқ ўрганиб чиқилди. Маҳсулот эса Европанинг энг мураккаб бўлган синов лабораторияларидан бир неча маротаба муваффақиятли ўтди.
USDA ORGANIC – бу АҚШ Қишлоқ хўжалиги вазирлиги томонидан ишлаб чиқилган экологик сертификат. Сертификатлаш фақат малакали ва ваколатли USDA ORGANIC ходимлари томонидан амалга оширилади. USDA ёки Миллий Органик Стандарт мамлакат фуқароларини соғлом ва табиий органик маҳсулотлар истеъмолига ўтказиш учун ноёб миллий дастурнинг бир қисми сифатида қабул қилинган. Бугунги кунда USDA ORGANIC деб белгиланган маҳсулотлар 100 фоиз экологик тоза табиий ингредиентларни ўз ичига олиши кафолатланади.
Шунингдек, АҚШ Озиқ-овқат маҳсулотлари ва дори воситаларини назорат қилиш бошқармаси (FDA – Food and Drug Administration) Ўзбекистондан АҚШга BMB Za'faron бренди остида заъфарон маҳсулотини импорт қилишга рухсат бергани муҳим қадам бўлди. Control Union Certifications ташкилоти (Нидерлендия) томонидан берилган USDA ORGANIC сертификатининг амал қилиш муддати яна бир йилга узайтирилди.
Ушбу ютуқлар BMB Za'faron учун экспорт имкониятларини кенгайтириш ва янги халқаро бозорларга чиқиш учун янги истиқболларни очади. Бу эса Ўзбекистон маҳсулотларининг жаҳон миқёсида салоҳияти ошиб бораётганидан далолат беради.
