Одам савдосига қарши курашиш ва муносиб меҳнат масалалари бўйича Миллий комиссияси томонидан Ички ишлар вазирлиги, Халқаро миграция ташкилотининг Ўзбекистондаги ваколатхонаси билан ҳамкорликда ўтказилган мазкур тадбир 30 июль – Бутунжаҳон одам савдосига қарши курашиш кунига ҳамда «Одам савдосига қарши курашда ўттиз кунлик ҳамкорлик» ойлигини якунлашга бағишланган.
Унда Олий Мажлиси Сенати Раиси, Одам савдосига қарши курашиш ва муносиб меҳнат масалалари бўйича Миллий комиссия раиси Т.Нарбаеванинг мурожаати конференция иштирокчиларига ўқиб эшиттирилди.
Таъкидланганидек, охирги йилларда мамлакатимизда барча соҳаларда, энг аввало, инсон ҳуқуқлари ва эркинликларини таъминлаш йўналишида кенг қамровли ислоҳотлар амалга оширилди. Бу йўналишда парламент, ҳукумат ва фуқаролик жамияти институтларининг амалий ҳамкорлиги мутлақо янги босқичга кўтарилди.
Жумладан, одам савдосига қарши курашиш бўйича миллий қонунчилик такомиллаштирилди, охирги 5 йилда ушбу йўналишда 40 га яқин норматив-ҳуқуқий ҳужжатлар қабул қилинди.
Конференция давомида одам савдосига қарши курашиш соҳасидаги миллий қонунчиликни такомиллаштириш, ҳуқуқни муҳофаза қилиш органларининг ролини кучайтириш ва жамоатчиликни хабардор қилиш бўйича амалга оширилган ишлар иштирокчилар томонидан алоҳида эътироф этилди.
Тадбирда иштирок этган давлат органлари вакиллари, фуқаролик жамияти ташкилотлари, экспертлар, шунингдек, хорижий дипломатик корпус вакиллари томонидан одам савдосига қарши курашиш йўналишида амалга оширилаётган ишларнинг самарадорлигини ошириш, халқаро тажрибани миллий амалиётга қўллаш, одам савдосига қарши курашиш бўйича инновацион ёндашувлар, ахборот технологияларидан фойдаланиш, қурбонларни аниқлаш ва уларга ёрдам бериш механизмлари муҳокама этилди.
Конференция якунида иштирокчилар томонидан якуний ҳужжат – коммюнике қабул қилинди. Ушбу ҳужжатда иштирокчилар томонидан билдирилган таклиф ва тавсиялар асосида одам савдосига қарши курашиш бўйича халқаро ҳамкорликни яна-да ривожлантириш, соҳада келгусидаги устувор вазифалар бўйича бир қатор тавсиялар ўз ифодасини топди, деб хабар беради Олмй Мажлис Сенати матбуот хизмати.
