24 апрель, чоршанба куни бўлиб ўтган овоз бериш чоғида Хавфсизлик Кенгашига киритилган 15 давлатдан 13 таси ушбу ҳужжатни қабул қилишга овоз берди, Хитой бетараф қолди, Россия эса вето ҳуқуқидан фойдаланди.

Овоз бериш бошланишидан олдин Россиянинг БМТдаги доимий вакили Василий Небензя АҚШ ва Япония таклиф қилган резолюция матнини “ҳазил” деб атади. Ўз навбатида, АҚШ доимий вакили ўринбосари Роберт Вуд, агар Россия қарши овоз берса, “яшириш учун нимадир борми?” деган савол туғилишини айтди.

Резолюция лойиҳасида “бизнинг умумий мақсадимиз – коинотда қуролланиш пойгасининг олдини олиш”, шунингдек, Коинот шартномаси бўйича мажбуриятларга риоя қилиш, хусусан, “Ер атрофидаги орбитага ҳеч қандай ядро қуроли ёки оммавий қирғин қуролларини жойлаштирмаслик кераклиги таъкидланган”. Шунингдек, у БМТ Хавфсизлик Кенгаши аъзоларини “Ер атрофидаги орбитага махсус жойлаштиришга мўлжалланган ҳеч қандай ядро қуролини ишлаб чиқмасликка” чақиради, деб хабар беради dw.com.