Миллий матбуот марказида «Экологик муаммоларни ёритишда бирлашайлик» мавзусида давра суҳбати бўлиб ўтди. Унда Ўзбекистон журналистлари ижодий уюшмаси қошида фаолиятини бошлаган Экологик журналистика кенгашининг жорий йилдаги режалари ва атроф-муҳит барқарорлигини таъминлашга қаратилган мавзуларни ёритишда журналистлар олдида турган вазифалар муҳокама қилинди.
Тадбир ташкилотчилари айни кунда долзарб саналган, аммо эътибордан четда қолаётган мавзулар — биохилма-хилликнинг камайиши, сув ресурсларидан оқилона фойдаланмаслик, дарё ўзанларининг кенгайиб бориши ва шаҳар ҳудудларида қушларнинг камайиб кетаётгани ҳақидаги муаммоларга таҳлилий ёндашиб, ОАВда кенгроқ ёритиш лозимлигини таъкидлаб ўтди.
— Экожурналистика — бугунги кун учун муҳим соҳа, — дейди Экологик журналистика кенгашининг раиси, филология фанлари доктори Наргис Қосимова. — табиатга боғлиқ муаммоларнинг аҳамияти, эътиборсизлигимиз ўзимиз учун қимматга тушиши ҳақида оммага дўстона маслаҳат қиладиган ҳам, таҳлиллар билан таништирадиган ҳам ОАВ ходимлари. Тўғри, мактабгача таълим ва мактаб таълимида табиатга муносабат ўргатилади. Аммо таҳлиллар шуни кўрсатадики, чиқиндиларнинг мумкин бўлмаган жойга ташланиши ва табиат ресурсларини тежамаслик, ов қилиш қоидаларини бузиш ҳолатларида асосан ўрта ёшлиларнинг ҳиссаси катта. Биз экологик хавфлар ҳақида шунчаки хабар бериш билан чекланмаслигимиз керак. Унинг оқибатларини таҳлилий мақола, лавҳа ва эшиттиришлар орқали аудиторияга тушунтиришимиз лозим.
Экология атамаси мазмунидан ҳам маълумки, бутун табиат ўз уйимиз. Демак, қилаётган хатоларимиздан ўзимиз жабр кўрамиз. Табиатга бўлган меҳримиз ҳам кун келиб ўзимизга қайтади.
Феруза Мухторовна
