Самарқанд шаҳридаги қадимий ёдгорликлар, масжиду мадрасаларнинг пештоқи, эшик ва дарвозалари араб ёзувидаги турли матнлар билан безатилганини яхши биламиз. Бироқ уларнинг маъно-мазмунидан хабардормисиз?
Мисол учун, Шердор мадрасаси пештоқига ҳам арабча матн битилган. Бу Қуръони Каримнинг “Анъом” сурасидаги 115-117 оятлардир. Унинг тепасида эса куфий хатида, яъни тўрт бурчак шаклда “Мулк Аллоҳникидир, буюклик Аллоҳга хос. Куч-қудрат Аллоҳникидир. Қувват Аллоҳникидир. Аллоҳга шукр” калималари битилган.
Айтиш жоизки, мазкур битикнинг ўрта қисми тарих силсиласида турли омиллар сабаб ўчиб кетган эди. Уни маҳоратли уста-ҳунарманд Давлат Ҳакимов 2000 йилда қайта тиклашга муваффақ бўлган. Бугунги кунда ҳам обидалардаги ёзувларни ўрганиш ишлари олиб борилмоқда.
