Мусобақа “Пахтакор” спорт мажмуасида ўтказилиб, унда турли мамлакатлардан ташриф буюрган ёш ва истиқболли спортчилар иштирок этишди.

14 декабрь куни шпага йўналишидаги жамоавий мусобақанинг мазкур тури расман якунланди. Беллашувлар давомида жамоалар ўртасида кескин рақобат кузатилди, ҳар бир учрашув юқори тезлик ва аниқ ҳисоб-китоблар асосида бўлиб ўтди.

Мусобақа халқаро қоидаларга тўлиқ мувофиқ равишда ташкил этилди. Бу эса беллашувларнинг холис ва шаффоф ўтишига замин яратди.

Жамоавий баҳслар якунига кўра, қуйидаги терма жамоалар совринли ўринларни қўлга киритди:

Миср — учрашувларда юқори аниқлик ва мустаҳкам тактика намоён этди;

Греция — тажриба ва жамоавий уйғунлик билан ажралиб турди;

Ўзбекистон — ирода ва ишонч билан бронза медалига сазовор бўлди;

Ҳар битта давлатдан биттадан жамоа иштирок этди. Спортчиларимиз халқаро майдонда муносиб иштирок этиб, юқори натижаларга даъво қила олишини яна бир бор исботлади. Ўзбекистон ёшлар терма жамоасининг мазкур натижаси миллий қиличбозликнинг изчил тараққий этаётганини кўрсатади.

Мусобақа дастури аввал яккалик учрашувлари билан бошланиб, кейинчалик жамоавий баҳслар билан давом этди. Бундай формат ёш спортчиларнинг техник маҳорати билан бир қаторда, жамоа билан ишлаш кўникмасини ҳам ривожлантиришга хизмат қилади.

Тошкентда ўтказилган шпага бўйича Жаҳон кубоги босқичи мамлакатимизда қиличбозлик спортига бўлган эътибор ортиб бораётганини намоён этди. Беллашувлар натижалари ва иштирокчилар кўрсатган ўйин сифати мусобақанинг юқори савияда ўтганини тасдиқлади.

Зулхумор АКБАРОВА