Материал муаллифи Ўзбекистон томонидан сўнгги беш йил давомида қўшни давлатлар билан конструктив ва ўзаро манфаатли алоқалар ўрнатиш бўйича олиб борилаётган янги минтақавий сиёсат доирасида Афғонистон билан ҳамкорликни ривожлантириш устувор йўналишлардан бири этиб белгиланганини таъкидлаган. Ўзбекистон доимо қўшни давлатдаги вазиятни тезроқ барқарорлаштириш тарафдори бўлиб келган. Зеро бунга эришиш минтақавий хавфсизликни таъминлашнинг муҳим шарти ҳисобланади, жумладан, Ўзбекистон иқтисодиётини ривожлантириш, янги сармоялар жалб этиш ва ташқи иқтисодий фаолиятни фаоллаштириш учун янада қулай имкониятлар яратади.
Нашр Афғонистон ҳудудида транспорт-коммуникация лойиҳаларини амалга ошириш шарқдан ғарбга ва шимолдан жанубга энг қисқа масофаларда қитъалараро транспорт йўлакларини ривожлантириш учун қулай шароит яратишини қайд этган, деб хабар беради «Дунё» АА.
«Термиз - Мозори Шариф – Кобул - Пешовар темир йўлининг қурилиши Марказий ва Жанубий Осиёнинг транзит салоҳиятини тўлиқ рўёбга чиқаради, юкларни ташиш вақти ва нархини сезиларли даражада камайтиради», — деб ёзади муаллиф.
Мақолада мазкур темир йўл стратегик аҳамиятга эга лойиҳа бўлиб, Ўзбекистон ва Марказий Осиёнинг бошқа мамлакатлари учун Покистоннинг Ҳинд океанидаги портларига чиқиш имкониятини тақдим этиши ҳамда Марказий Осиё минтақасининг транзит салоҳиятини сезиларли даражада ошириши қайд этилган.
