Марказий Евроосиё давлатларининг космик агентликлари ва тегишли ташкилотлари иштирок этаётган конференцияда бир қатор лойиҳалар, истиқболли ғоялар, жумладан, сунъий йўлдош алоқа тизимларининг ривожланишига оид долзарб мавзулар муҳокама этиляпти.

Бугун мазкур конференцияда «Ўзбектелеком» АК бош директорининг истиқболли ривожлантириш ва инновациялар бўйича ўринбосари Акмал Арифджанов маъруза қилди.

Унда «Ўзбектелеком» Компанияси халқаро алоқа ташкилотлари билан ҳамкорлик қилган ҳолда телекоммуникация лойиҳаларида фаол иштирокини, хорижий операторлар ва телекоммуникация ускуналари ишлаб чиқарувчилари билан икки томонлама ҳамкорлик алоқалари ҳамда Халқаро электр алоқа иттифоқи (ХEИ), Алоқа соҳасида минтақавий ҳамдўстлик (АСМҲ) va «Intelsat» сунъий йўлдош алоқа ташкилоти билан фаол ҳамкорлик олиб борилаётгани таъкидланди.

Таъкидлаш жоизки, компаниянинг маҳаллий телекоммуникация тармоғи замонавий технологияларга асосланган бўлиб, доимий равишда янгиланиб боряпти.

2022 йилга келиб, компания дунёнинг 107 та давлатидаги 174 та халқаро оператор билан ҳамкорлик роуминг алоқаларини ўрнатди. Шу билан бирга, UZTELECOM мобил алоқа абонентлари учун дунёнинг 100 дан ортиқ мамлакатларида роуминг хизматлари тақдим этилади.

«Ўзбектелеком» АК симли телефон алоқаси соҳасида 30 га яқин халқаро операторлар билан ҳамкорликда иккита халқаро коммутация узеллари орқали халқаро телефон алоқасини амалга оширяпти.

Шунингдек, компания бош директори ўринбосарининг нутқида «Ўзбектелеком» АК иштирокида ташкил этилган «Uz-Sat» компаниясининг янги имкониятлари таъкидланди.

Компаниянинг асосий фаолияти ўзининг VSAT тармоғини яратиш, республика ҳудудида мобил йўлдош алоқа хизматларини кўрсатишни шакллантириш ва ривожлантиришга йўналтирилган мобил сунъий йўлдош телефониясини таъминлашга қаратилган.

Шу билан бирга, лойиҳани амалга ошириш асосида бутун Ўзбекистон бўйлаб, шу жумладан бориш қийин бўлган ҳудудларда, шунингдек, нефть-газ саноати (ишлаб чиқариш, мониторинг, ҳисобга олиш) соҳасида тадқиқот олиб бориладиган йўналишларда сунъий йўлдошли Интернет ва телефония хизматлари кўрсатилади.

Лойиҳа доирасида чет эл операторлари – Thuraya, Inmarsat, Globalstar, Iridium, Orbcom, Viasat, OneWeb, StarLink ва бошқа сунъий йўлдош операторлари билан биргаликда Интернетга уланиш хизматлари, сунъий йўлдош телефония хизматлари, автотранспорт воситалари тезлиги ва йўналиши параметрларини кузатиш хизматлари кўрсатилади.

Юқоридаги мақсадга эришиш учун «Ўзбектелеком» АК телекоммуникация тармоғи орқали хорижий инвестицияларни жалб этган ҳолда, халқаро тармоқларга уланиш йўли билан сунъий йўлдош ерусти станциясини (марказий ерусти станцияси) қуриш режалаштирилган, деб хабар беради «Ўзбектелеком» АК матбуот хизмати.

Таъкидлаш жоизки, «Ўзбектелеком» АК ўз фаолиятини давом эттирган ҳолда доим тақдим эта олаётган хизматлар турларини ривожлантириш ва кенгайтиришга интилади.