Айтилишича, Фармацевтика тармоғини ривожлантириш агентлигига Дори воситалари, тиббий буюмлар ва тиббий техника экспертизаси ва стандартлаштириш давлат маркази томонидан ўтказилган экспертиза натижалари юзасидан хат келиб тушган.
— Экспертиза натижаларига кўра, Тошкент шаҳридаги айрим дорихоналардан харид қилинган (серия 550323, яроқлилик муддати 11.2025, ЖАЖ "Галичфарм") «Л-Лизин Эссинат Инекция учун эритма 5 мл» дори воситаси Давлат маркази томонидан ўтказилган экспертиза натижаларига кўра қалбакилаштирилган дори воситаси эканлиги аниқланган, — дейди Севара Туляганова. — Ушбу дори воситасини муомаласига чек қўйиш мақсадида, мувофиқлик сертификатига эга бўлмаган, давлат рўйхатидан ўтмаган, қалбакилаштирилган дори воситаси зудлик билан муомаладан чиқарилиши ҳамда дори воситаларининг инсон соғлиғига зарарли таъсирини тасдиқловчи фактлар аниқланган тақдирда муомаладан чиқариш ва йўқ қилиш тартиби тўғрисидаги низомда белгиланган тартибда йўқ қилиниш бўйича тегишли кўрсатма берилди.
Агентлик масъуллари тадбиркорларга мурожаат қилиб, амалдаги қонунчиликка кўра, ушбу ҳуқуқбузарликлар маъмурий ва жиноий жавобгарликлар билан бир қаторда лицензия талаб ва шартларининг қўпол бузилиш ҳолати деб баҳоланишини, бу лицензиянинг бекор қилинишига асос бўлишини эслатган.
«Сизлардан ушбу ҳуқуқбузарлик ҳолатига йўл қўймаслик ва уни бартараф этиш чораларини кўришингизни сўраймиз», — дейилади агентлик масъули тадбиркорларга мурожаатида.
