Гулистон туман ҳокимияти матбуот хизмати расми
Бугунги кунда туманда 21 та Давлат мактабгача таълим ташкилотлари, 5 та Давлат хусусий шериклик асосидаги нодавлат мактабгача таълим ташкилотлари, 93 та оилавий Нодавлат мактабгача таълим ташкилотлари фаолият юритиб келаётган бўлиб, боғча ёшидаги болаларнинг мактабгача таълимга қамров даражаси 96,7% ни ташкил этади.
«Обод қишлоқ» лойиҳаси доирасида Теракзор маҳалласидаги 15-сонли давлат мактабгача таълим ташкилоти қайта таъмирланиб, бугун 180 ўринли янги биноси болажонлар учун ўз бағрини очди. Мазкур мактабгача таълим муассасасининг бунёд этилишида «Барака Гулистон» МЧЖ томонидан лойиҳа қиймати 2 миллиард 93 миллион сўмлик қурилиш-таъмирлаш ишлари бажарилган.
Ҳудудда яшовчи оилаларнинг 180 нафарини ўз бағрига олаётган боғча ақлни пешлайдиган, билимни чархлайдиган замонавий таълим-тарбия воситалари билан жиҳозланган. Бу ерда болажонларнинг овқатланиши, дам олиши, тўгаракларда шуғулланишлари учун барча шарт-шароит яратилган. Санитария-гигиена, тиббиёт, ёш гуруҳлар учун хоналар, мусиқа зали, алоҳида ошхона, умумий овқатланиш зали, ёзги айвончалар, ўйинлар майдончалари барпо этилди, деб хабар беради Гулистон тумани ҳокимлиги ахборот хизмати.