Япония ҳукумати ҳудудлардан келиб тушган талабномалар ва коронавирус билан боғлиқ вазиятга асосланиб, 13 январдан эътиборан қуйидаги ҳудудлар учун ҳам манзилли фавқулодда ҳолат эълон қилди: Осака, Киото, Хёго, Айти, Гифу, Тотиги, Фукуока.

Фавқулодда ҳолат 7 февралга қадар давом этади.

Аввал таъкидланганидек, карантин талаблари тавсиявий характерда бўлиб, умумий овқатланиш корхоналари ва бошқа кўнгилочар масканлар фаолиятини соат кечки 8 га қадар этиб белгилаш сўралмоқда. Қисқартирилган графикка ўтганлик учун тадбиркорлик субъектларига бой берилган фойдани қоплаш мақсадида тегишли моддий ёрдам пули ажратилиши назарда тутилган.

14 кунлик карантин талабларини бажармаган хорижлик фуқаролар Япониядан депортация қилиниши мумкин

Япония декабрь ойида барча мамлакатлар учун эшигини ёпгач, мамлакатга кириб чиқиш ҳуқуқи японлар ва доимий визага эга бўлган чет эллик фуқароларда қолган эди. Бунда асосий мажбурият - чет элдан Японияга қайтиб келгач, 14 кунлик карантинга олиниши лозим.

Япония Иқтисодиёт вазири - айни пайтда пандемия масалалари бўйича масъул вазирнинг ахборотига кўра, 14 кунлик карантин талабини бузганлик учун жавобгарлик янада кучайтирилиши (чет эл резиденти статусининг бекор қилиниши ва депортация қилиниши) режалаштирилмоқда.