Фонд маълумотига кўра, лойиҳанинг асосий мақсади эшитиш қобилияти заиф болаларнинг касб маҳоратини ривожлантириш ва ижтимоийлашувда қўллаб-қувватлаш, уларни олий ўқув юртларига ўқишга киришга тайёрлаш, шунингдек, ахборот технологиялари соҳасида ихтисослаштирилган мактаб-интернатлар ўқитувчиларининг малакасини ошириш ва янги методологияни ишлаб чиқишдан иборат.
Ушбу лойиҳа биринчи «Zamin Education» ўқув-ресурс маркази очилган Муҳаммад ал-Хоразмий номидаги ихтисослаштирилган АКТ-мактаби билан ҳамкорликда амалга оширилмоқда. Лойиҳага мўлжалланган синфда маълумотларни қабул қилиш сифатини оширишга қаратилган ёрдамчи ускуна — FM-тизими ўрнатилган. Шунингдек, ҳар бир ўқувчига индивидуал эшитиш воситалари тақдим этилган.
«Замин» фонди васийлик кенгаши раиси Зироат Мирзиёева ўқув жараёни билан танишиш учун ушбу синфга ташриф буюриб, 102 ва 106-сонли ихтисослаштирилган мактаб-интернатларнинг юқори синф ўқувчилари билан суҳбатлашди. Илиқ муҳитда болалар ўз таассуротлари билан ўртоқлашди ва ўрганилаётган мавзулар ҳақида сўзлаб берди.
Биринчи ўқув-ресурс марказининг муваффақиятли натижаларидан сўнг мамлакатнинг барча ҳудудларида «Zamin Education» синфларини ташкил этиш режалаштирилган.