Дар давоми ҳафт соли охир дар мамлакати мо шумораи корхонаҳои саноатӣ ба 110 ҳазор адад расид. Истеҳсоли бештар аз 2 ҳазор хели нави маҳсулот азхуд карда шуд. Соли гузашта ҳаҷми содирот 1,6 баробар афзуда, ба 19 миллиард доллар расид. Дар натиҷа муомилоти бор дар мамлакати мо 30 фоиз афзуд.
Барои кишварҳое чун Ӯзбекистон, ки мустақиман ба уқёнуси ҷаҳонӣ дастрасӣ надоранд, қулайтарин ва арзонтарин нақлиёт роҳи оҳан аст. Аммо ҳоло ҳамагӣ 5 дарсади маҳсулот дар бозори дохилӣ ва 45 дарсади молҳои содиротӣ тавассути роҳи оҳан интиқол дода мешавад. Яъне, ҶС «Ӯзбекистон темир йӯллари» наметавонад бо ҳамлу нақли бор тавассути нақлиёти автомобилӣ рақобат кунад.
Солҳои зиёд соҳа ислоҳ карда нашуд, низоми ҳозиразамони идоракунӣ ҷорӣ карда нашудааст. Дар баробари ин, аз сабаби омилҳои беруна хароҷоти нақлиёт ва логистика зиёд шудааст. Дар натиҷа ҳам даромади ҷамъияти саҳҳомӣ ва ҳам сифати хизматрасонӣ паст боқӣ мемонад.
Аз ҷумла, нарасидани вагонҳо ва куҳна шудани парки онҳо зикр гардид. Дар тарифҳои ҳозира ва модели идоракунӣ иштироки сектори хусусӣ дар соҳа мушкил гардидааст. Даромади аксарияти истгоҳҳо хароҷотро пӯшонда наметавонад. Сатҳи рақамикунонӣ нокифоя боқӣ мемонад. Аҳолӣ аз сатҳи хидматрасонӣ дар вокзалҳо, маҳдуд будани дастрасӣ ба вокзалҳои марказӣ, номувофиқ ҷойгир шудани таваққуфгоҳҳо, коррупсия дар фурӯши билет, шароит ва хидматрасонӣ дар вагонҳо норозӣ аст.
Дар ҷамъомад баъди таҳлили ин мушкилот таклифҳо оид ба ислоҳоти соҳа муҳокима шуданд.
Ҳамин тариқ, ба нақша гирифта шудааст, ки ҷамъияти саҳҳомии «Ўзбекистон темир йўллари» ба холдинг табдил дода, дар он идоракунии ҳозиразамон ҷорӣ карда, корхонаҳои алоҳида ташкил карда, вазифаҳо оид ба ногоҳдории инфрасохтор, боркашонӣ ва логистика, мусофиркашонӣ, идораи истгоҳҳо тақсим карда шаванд.
Сарвари давлатамон ин пешниҳодҳоро пазируфта, ҷиҳати баланд бардоштани самаранокии соҳа супоришҳои иловагӣ дод. Зарурати таъмин кардани ҳисоби муҳосибии шаффоф, ба корхонаҳо ҷалб намудани мутахассисону сармоягузорони хориҷӣ бидуни кафолати давлатӣ қайд гардид.
Қарор шуд, ки барои бахши хусусӣ тарифҳои ҷолиб офарида, ба соҳибкорон барои хариди вагонҳо қарз дода шавад. Имконияти бунёди маҷмааҳои замонавии савдо дар атрофи вокзалҳои марказӣ ва гузоштани ҷой дар худи истгоҳҳо барои музояда зикр гардид. Майдонҳои холии муайяншудаи атрофи вокзалҳо метавонанд барои лоиҳаҳои логистикӣ ва истеҳсолӣ ҷудо карда шаванд.
Вазифа гузошта шуд, ки якҷоя бо Вазорати технологияҳои рақамӣ расмигардонии электронии ҳуҷҷатҳо ба роҳ монда, дар вагонҳо GPS насб карда, оид ба тамоюли "равзанаи ягона" анбори онлайнӣ ташкил карда шавад.
Муҳим будани барӯйхатгирии активҳои асосии “Ўзбекистон темир йўллари” ва равона намудани маблағ аз фурӯши онҳо ба беҳтар гардондани инфрасохтори роҳи оҳан қайд гардид.
Аз сабаби ба пойтахт ва марказҳои вилоятҳо даромадани қисми зиёди поездҳои боркаш дар истгоҳҳо суръати ҳаракат зиёд мешавад. Ба ин муносибат зарурияти дида баромадани имкониятҳои ба берун аз шаҳрҳо кӯчондани стансияҳои боркаш қайд карда шуд. Ин боиси кам шудани ҳаракати нақлиёти боркашонӣ дар шаҳрҳо ва ба маҳалҳо ҷалб намудани маблағҳои иловагӣ мегардад.
Ба прокурори нақлиёт супурда шуд, ки ба танзимоварии тамоми гузаргоҳҳои роҳи оҳанро барои бехатарии шаҳрвандон ва ҳаракати роҳ таъмин намояд.
Масъалаҳои баланд бардоштани ихтисоси кадрҳо ва сифати хидматрасонӣ низ ба миён гузошта шуданд.
Сарвари давлат таъкид кард, ки натиҷаи ислоҳоти соҳа бояд бунёди чунин низоми роҳи оҳан бошад, ки мардум ва соҳибкоронро қаноатманд созад.
Аз рӯи масъалаҳои дар маҷлис муҳокимашуда шахсони масъул маърӯза карданд.
