Чунки мазкур учрашув асносида Ўзбекистон — АҚШ муносабатларида янги саҳифа очилди. Бу нафақат икки давлат ўртасидаги мулоқотнинг янги босқичи, балки стратегик шерикликни янада чуқурлаштириш йўлидаги муҳим қадам сифатида тарихга кирди. Ўзбекистон ва АҚШ етакчиларининг юзма-юз мулоқоти, том маънода, икки халқ келажагига йўналтирилган, дунё сиёсий майдонида катта аҳамият касб этган воқеа бўлди.

Давлатимиз раҳбари БМТ Бош Ас­самблеяси сессиясидаги нутқи давоми­да қатор устувор йўналишларга тўхтал­ди.

Биринчиси, тинчлик ва хавфсиз­лик масаласи. Президентимиз глобал хавфсизлик муаммолари, янги таҳдид ва чақириқлар шароитида давлатлар ўртаси­да ишонч ва ҳамкорликни мустаҳкамлаш зарурлигини қайд этди. Ўзбекистон ҳар доим тинчликпарвар сиёсатга содиқ экани ва минтақавий барқарорликка ўз ҳиссаси­ни қўшишини таъкидлади.

Иккинчиси, инсон ҳуқуқлари ва демократия. Инсон ҳуқуқ ва эркинликлари­ни ҳимоя қилиш, жамиятда адолат ва қонун устуворлигини таъминлаш масалалари нутқ­дан алоҳида ўрин олди. Янги Ўзбекистонда­ги ислоҳотлар инсон қадрини улуғлаш та­мойили асосида амалга оширилаётгани дунё ҳамжамиятига яна бир намойиш қилинди.

Учинчиси, барқарор тараққиёт ва иқ­лим масалалари. Экологик муаммолар, айниқса, Орол фожиаси ва оқибатлари дунё учун оғриқли масала сифатида кўтарилди. Шу билан бирга, иқлим ўзгаришларига қар­ши курашда барча давлатлар бирлашиши ло­зимлиги таъкидланди.

Тўртинчиси, ёшлар ва таълим. Дав­латимиз раҳбари ёшлар масаласига ҳам алоҳида эътибор қаратди. Янги Ўзбекистоннинг асосий бойлиги ёшлар экани, уларнинг салоҳиятини юзага чиқариш, билими ва салоҳиятидан самарали фой­даланиш орқали барқарор тараққиётга эришиш мумкинлиги айтилди. Шу маъ­нода, халқаро ёшлар ҳамкорлигини ку­чайтириш таклиф этилди.

Бешинчиси, халқаро ҳамкорлик ва ҳамжиҳатлик. Нутқдаги яна бир муҳим жиҳат — глобал муаммоларни ечишда дав­латларнинг ўзаро ҳамкорлиги ва ҳамжиҳат­лиги зарурлиги ҳақидаги фикрлардир. Мил­лий ёки минтақавий манфаатлар эмас, балки бутун инсоният тақдири устувор бўлиши кераклиги таъкидланди.

Президентимиз нутқи инсоният олдида турган долзарб масалаларни ҳал қилишда Ўзбекистоннинг изчил позициясини ва гло­бал ташаббускорлигини намоён этди.

Ташриф доирасида савдо-иқтисодий ва маданий-гуманитар ҳамкорликни кенгайти­риш масалалари юзасидан турли учрашувлар ҳам бўлиб ўтди. Хусусан, Президентимиз АҚШда истиқомат қилаётган ватандошлар, шунингдек, “Эл-юрт умиди” жамғармаси стипендиатлари билан самимий учрашув ўтказди. Бу мулоқот нафақат маънавий қув­ват манбаи, балки янги Ўзбекистон — янги имкониятлар мамлакати эканининг амалдаги тасдиғи бўлди.

Суҳбатнинг асосий мақсади ўзи узоқда бўлса-да, юрт тақдирига бефарқ бўлмаган фарзандлар қалбини Ватанга боғлаш, улар­ни янги тараққиёт жараёнларига фаол жалб этиш эди. Президентимиз ёшларга самимий меҳр ва юксак ишонч билдирди, уларнинг билими ва тажрибаси мамлакатимиз та­раққиёти учун жуда зарур эканини таъкид­лади.

Учрашувда қайд этилганидек, 500 дан зиёд стипендиатнинг АҚШда таҳсил олаёт­гани мамлакатимизда илм-фан, таълим ва кадрлар салоҳиятини оширишга қаратилган эътибор самарасидир. Бу авлод эртага Ватан тараққиётининг таянчи ва етакчи кучи бўли­ши кутилмоқда.

Шу билан бирга, мулоқот рамзий жиҳат­дан ҳам катта аҳамиятга эга. Дунёнинг қайси бурчагида бўлмасин, Ўзбекистон фарзандла­ри ҳамиша Ватан меҳри ва давлат ғамхўрли­ги доирасидан ташқарида эмаслигини кўр­сатди.

Президентимизнинг АҚШга ташрифи доирасида ўтказилган учрашувлар нафақат сиёсий ва дипломатик, балки иқтисодий ва инновацион ҳамкорлик масалаларини ҳам янги поғонага олиб чиқди. Суҳбатлар чоғида икки давлат ўртасидаги стратегик шерикликнинг келгуси йўналишлари белгилаб олинди.

Айниқса, миллий иқтисодиётга АҚШ­нинг илғор тажрибаси ва замонавий техноло­гияларини жорий қилиш масаласи алоҳида аҳамият касб этди. Хусусан, инвестициявий муҳитни янада очиқ ва рақобатбардош этиш, қўшма лойиҳалар орқали янги иш ўринлари очиш, шунингдек, электрон савдо майдон­лари — маркетплейсларни ривожлантириш масалалари муҳокама этилди.

Шу билан бирга, тиббиёт, транспорт ва логистика соҳаларида инновацияларни қўл­лаш, рақамли ечимларни жорий этиш ҳамда юқори технологияли соҳаларда қўшма дастурларни амалга ошириш икки томонлама ҳамкорликнинг истиқболли йўналишлари сифатида белгиланди. Хусусан, АҚШнинг тиббиёт соҳасидаги илғор тажрибасини Ўз­бекистон клиникаларига жорий этиш орқали замонавий диагностика ва даволаш стан­дартлари кенг қўлланиши кўзда тутилмоқда.

Бу ташаббуслар, аввало, Ўзбекистон иқтисодиётининг глобал бозордаги рақо­батбардошлигини кучайтириш, шунингдек, мамлакатимизда янги инновацион муҳитни шакллантиришга хизмат қилади. Шу та­риқа АҚШ билан иқтисодий ва инновацион шериклик мамлакатимиз тараққиётининг стратегик устувор йўналишларидан бири си­фатида намоён бўлмоқда.

АҚШ билан ҳамкорлик доирасидаги ушбу ташаббуслар олий таълим учун ҳам улкан имкониятлар эшигини очади. Аввало, илғор технологияларни таълим жараёнига жорий қилиш, АКТ ва инновацион педаго­гика соҳаларида қўшма дастурларни амалга ошириш имконияти пайдо бўлади. Шу орқа­ли Ўзбекистонда педагогика йўналишидаги олий таълим муассасалари талабалари ва профессор-ўқитувчилари халқаро тажриба­дан бевосита баҳраманд бўлиши, илм-фан натижаларини иқтисодий амалиёт билан боғлай олиши мумкин.

Президентимизнинг БМТ минбарида сўзлаган нутқини катта қизиқиш билан кузатдик. Чунки унда кўтарилган маса­лалар — тинчлик ва барқарор тараққиёт, инсон ҳуқуқлари, ёшлар ва таълимга оид ғоялар — айнан университетимиздаги таълим-тарбия ишлари билан чамбарчас боғлиқ.

Ўзбекистон етакчисининг глобал ташаббуслари, айниқса, ёшлар сиёсати ва таълим соҳасига доир фикрлари универси­тетимиз ривожи учун муҳим дастуруламал вазифасини ўтайди. Профессор-ўқитув­чилар ва талабалар фаолиятини айнан шу ғоялар асосида йўналтириб, янги авлод педагог ва мураббийларини тарбиялашни мақсад қилган.

Шу билан бирга, нутқда таъкидланган барқарор тараққиёт ва экологияга оид ма­салалар, жумладан, Оролбўйи муаммосига доир ташаббуслар ҳам университетимизда ўтказилаётган илмий тадқиқотлар ва маъ­навий-маърифий ишларда муҳим аҳамият касб этмоқда. Чунки келажак авлодга соғлом муҳит, тинч ва фаровон мамлакат қолдириш таълим муассасаларининг ҳам умумий бурчидир.

Президентимизнинг Нью-Йоркка ташри­фи, тарихий учрашуви ва мулоқотлари янги Ўзбекистоннинг халқаро майдондаги ну­фузини янги поғонага кўтарди. БМТ мин­барида янграган ташаббуслар, учрашувлар ва ватандошлар билан самимий мулоқот — барчаси янги Ўзбекистоннинг дунё ҳамжа­миятида муҳим ва муносиб ўрин эгаллаётга­нини яққол намоён этди.

Мақсуд ЮЛДОШЕВ,

Жиззах давлат педагогика университети ректори, профессор

Ҳамкорлик материали