Исбилермен топарлар арасындағы байланысларды беккемлеў, жаңа жойбарларды ислеп шығыў, улыўма, еки тәреплеме саўда-экономикалық бирге ислесиўди раўажландырыў жолындағы гезектеги үлкен қәдем болған бул илажда ҚХР Айрықша ҳәм толық ҳуқықлы елшиси Ю Жун, тийисли уйымлардың басшылары өзбек ҳәм қытай бизнесиниң 400 ден аслам ўәкиллери қатнасты.
Шығып сөйлегенлер соңғы жылларда Өзбекстан-Қытай бирге ислесиўиниң көлеми избе-из кеңейип атырғанын атап өтти. Бүгинги күнде Қытай Өзбекстанның ең ири саўда ҳәм инвестициялық шериги есапланады.
Солай етип, 2024-жылдың жуўмағы бойынша Қытайдың мәмлекетимизге киргизген инвестициясы көлеми 10 миллиард доллардан асты, товар алмасыў көлеми болса 13,1 миллиард долларды қурады.
Өзбекстанда Қытай капиталының қатнасыўындағы 3 357 кәрхана жумыс алып бармақта. Қытай компаниялары Өзбекстан аймақларында энергетика, жеңил санаат, инфраструктураны раўажландырыў, азық-аўқат өнимлерин ислеп шығарыў, геология-излеў ҳәм басқа да тараўларда жойбарларды әмелге асырмақта.
Қатнасыўшыларға Өзбекстанда қолайлы бизнес жүргизиў, исбилерменлердиң ҳуқықлары менен мәплерин қорғаў ушын жаратылған шараятлар, мәмлекетимиздиң инвестициялық ҳәм санаат потенциалының әҳмийетли тәреплери ҳаққында мағлыўматлар берилди.
Инвестициялық жойбарларды әмелге асырыў ҳәм иске қосылғаннан кейин пайдаланыў процесинде исбилерменлерди ҳәр тәреплеме қоллап-қуўатлаўға таярлық билдирилди.
Форум шеңберинде Өзбекстанның инвестициялық ҳәм туристлик потенциалы презентациялары да өткерилди, B2B ҳәм B2G форматларында ушырасыўлар шөлкемлестирилди. Қатнасыўшылар жаңа исбилерменлик байланысларын орнатыў, перспективалы жойбарларды додалаў ҳәм өз-ара пайдалы шәртнамалар дүзиў имканиятына ийе болды.
Форум жуўмағында исбилерменлер менен ашықтан-ашық сөйлесиў шөлкемлестирилип, онда сырт елли қатнасыўшылар мәмлекетимизде исбилерменлик жумысын шөлкемлестириў ҳәм жүргизиўге байланыслы өзлерин қызықтырған сораўларға ҳәр тәреплеме жуўап алды, деп хабар береди Инвестициялар, санаат ҳәм саўда министрлигиниң баспасөз хызмети.
